Ngoma: Urubyiruko rwagannye BDF rwemeza ko yazahuye imibereho yabo

Urubyiruko rwo mu karere ka Ngoma rwagannye ikigega k’ingwate BDF, ruremeza ko iki kigega cyabafashije guhindura imibereho binyuze mu nguzanyo bahabwa.

Uru rubyiruko ruvuga ko mbere, rwabanje kujya rurangiza kwiga imyuga rukabura ibikoresho, ariko ubu byahindutse nta kibazo k’ibikoresho bafite.  Ni nyuma y’aho Leta y’u Rwanda iteganyije uburyo abarangije amashuri y’imyuga babona ibikoresho ku nguzanyo yunganiwe kugirango bibafashe bityo biteze imbere ndetse babe batanga akazi kuri bagenzi babo.

Ndizihiwe Jacques ni umusore uri mu kigero k’imyaka 24, atuye mu karere ka Ngoma, Umurenge wa Remera, Akagali ka Gasetsa  mbere y’uko agana iki kigega, avuga ko ubuzima butari bworoshye kuko atabashaga kuba yakwinjiza n’igihumbi nibura buri kwezi.

Yagize ati: “Mfite ubumenyi bwo gukora inzugi n’amadirishya ariko nari mfite imbogamizi zo kubona ibikoresho nakwifashisha ngo ntangire kubyaza umusaruro ubumenyi bwanjye bityo mbashe kwiteza imbere. Nibwo nagannye BDF nyereka ko mfite umushinga wo gusudira, bampa ibi bikoresho, ubu nkaba naratangiye kubibyaza umusaruro”.

Mu gihe kingana n’amezi ane ahawe ibikoresho birimo imashini ikata ibyuma, imashini isudira, avuga ko amaze kwigurira ikibanza gifite agaciro kangana n’ibihumbi magana atatu na makumyabiri kandi ngo afite icyizere ko mu minsi iri imbere azaba ageze ku rwego rwo kwigisha abandi bifuza kumenya umwuga.

Musamandera Fidelite wo mu murenge wa Rukumberi akagali ka Rwintashye nawe yemeza ko inkunga yahawe ari kimwe mu byamufashije kuzamura ubuzima bwe kandi akiri muto.

Agira ati: “Nkimara kwiga amashuri yisumbuye sinahise mbona akazi, ubuzima bwo mu cyaro burangora, ariko naje kugana iki kigega kuko najyaga numva bakivuga gusa ntibahise bamfata nyuma nza kongera baramfata, bampa imashini itera irangi imodoka n’amabati . Kuri ubu mbona akazi kandi maze kwiteza imbere kuko natangije ibihumbi bitandatu magana atanu, ubu ngeze ku bihumbi magana atandatu kandi namaze kwishyura n’ayo nasabwaga, ubu ndanacuruza”

Akomeza ashishikariza urundi rubyiruko kugana iki kigega bakirinda ababaca intege ahubwo bakiteza imbere.

 Umuyobozi wa BDF, Ishami rya Ngoma Sikubwabo Innocent avuga ko biteguye  gukomeza gukorana n’urubyiruko rwize imyuga rufashwa mu gukora imishinga ndetse runegerezwa serivisi zirufasha gushyira mu bikorwa ibyo rwize binyuze mu mirenge SACCO  ibegereye.

 Agira ati: “Urubyiruko rwize imyuga rufite impamyabushobozi, ntirukwiriye gupfusha ubusa amahirwe bahawe, ahubwo bagomba kugana ubuyobozi bw’Akarere ndetse na BDF kugira ngo bahabwe amakuru y’uko babona inguzanyo irimo nkunganire ya leta kuko bishyurirwa 50% by’inguzanyo baba bahawe”.

Ngoga Gilbert, Umuyobozi w’ishami ryo guteza imbere ubucuruzi n’amakoperative no guhanga umurimo muri aka karere, avuga ko mu Karere ka Ngoma muri uyu mwaka w’ingengo y’imari 2020/2021 bahize gukomeza gufasha urubyiruko kubona inguzanyo z’ibikoresho, ubu bakaba bamaze gutanga ibikoresho ku bantu 26.

Akomeza ashishikariza urubyiruko rwize imyuga ariko rufite imbogamizi zo kubona ibikoresho byo kubafasha gutangira akazi, ko iyi gahunda igikomeje, ko buri wese ubyifuza kandi wujuje ibisabwa yategura umushinga we akawugeza kuri BDF, kugirango ahabwe ibikoresho ku nguzanyo bityo bimufashe kwiteza imbere we ubwe, umuryango we ndetse n’igihugu muri rusange.

MUNEZERO JEANNE D’ARC

Be the first to comment

Leave a Reply

Your email address will not be published.


*