Ingaruka z’imihindagurikire y’ikirere ziteye inkeke ku buhinzi

Isi yose ikomeje guhangayikishwa n’ikibazo cy’imihindagurikire y’ikirere, mu Rwanda abahinzi batangiye guhura n’ibura ry’imvura mu gihe bakagombye kuba barateye intabire, n’imyaka ikaba yari igombye kuba igeze ibagara.

Kongera inganda nini zikoresha ingufu ziri hejuru, imiturire no kutabungabunga amashyamba n’ibidukikije muri rusange, ni bimwe mu bikorwa bya muntu bihumanya ikirere n’ibidukikije, binagira ingaruka zikomeye ku mihindagurikire y’ikirere. Ibi byose biza byiyongera ku bwiyongere bw’abaturage buri ku muvuduko ukabije.

Mu kiganiro n’Ikinyamakuru Panorama, Ngarukiye Athanase, umuturage wo mu karere ka Kayonza, Umurenge wa Kayonza, Akagari ka Musumba, Umudugudu wa Musumba, atunzwe n’umwuga w’ubuhinzi. Avuga ko ikirere gikomeje kudatanga imvura inzara izarushaho kwibasira abantu, kuko imyaka yumye ikiri mito.

Ati “Ubu ibishyimbo twari dufite byararangiye, igihe cy’itera kiratugeranye ntabwo tuzi uko bizagenda. Imvura nitagwa inzara iradukomangira, nta kundi rero turayamanitse; twebwe twakoze ibyo dushoboye ariko ikirere kiranze kandi ubusanzwe byari igihe cy’imvura n’ihinga.”

Mukasano Venantie, umuhinzi mu karere ka Musanze, mu murenge wa Kinigi, yemeza ko na bo bari basanzwe babona imvura ihagije ku buryo bahingaga buri gihe, ariko uko iminsi igenda ikirere kirushaho kubatenguha.

Ati “Uretse kumva inama dukesha ubukangurambaga mu kurinda neza ibidukikije, nta kindi Leta yatumarira kuko iki kibazo cy’imihindagurike y’ikirere tugisangiye n’isi yose.”

Ikibazo cy’ubuhinzi bwahuye n’ingaruka z’imihindagurikire y’ikirere kigaragara cyane mu ntara y’Iburasirazuba, aho imyaka yatewe ubwo imvura yagwaga yatangiye kuma, ibishyimbo bimwe byumye bikimera, ndetse na hamwe insina zatangiye kuma kubera ibura ry’imvura. N’iyo itonyanze izana n’umuyaga uhuhura ibigihagaze.

Nyuma yo kwitegereza ibi bibazo byose by’imihindagurikire y’ikirere n’ingaruka bigira ku muhinzi wibereye iyo ngiyo mu buzima bwe bwa buri munsi, inzobere mu bumenyi bw’ikirere n’imihindagurikire y’ibihe, Dr. Rutsindintwarane Gashumba Damascene yavuze ko ibi byose bifitanye isano n’ibikorwa bya muntu mu kwangiza ibimukikije, abyita iterambere.

Aganira na Panorama, Dr. Gashumba agira ati “Ntabwo tugomba kwigira ba ‘Ntibindeba’, kuko iyo duciye ibiti tugiye guteka ibyo turya tutitaye mu gutera ibindi, burya hari ikibi tuba dukora kandi kizatugiraho ingaruka mu gihe tutazi kiri imbere.”

Dr. Gashumba ashimangira cyane ku ruhare rw’inganda nini zikomeye ku Isi, kuko nizo za mbere mu kwangiza ikirere. Asaba ibihugu bifite inganda zikomeye ari na zo ziza ku mwanya wa mbere mu guhumanya ikirere ko byazajya byishyura indishyi.

Isi ntisakaye!

Mu rwego rwo gusobanura uburyo ibihumanyije ikirere cy’igihugu runaka bishobora guhumanya n’ikirere cy’ikindi gihugu kiri kure, Dr. Gashumba yagerageje kubisobanura akoresheje imvugo igira iti “Isi ntisakaye”.

Ati “Iyo urimo gutembera hafi y’ishyamba rya Nyungwe imvura ihise, uzabona ibicu bisa n’imyotsi bizamuka. Iyo bigeze mu kirere bihura n’ibindi bicu kandi bikagenda. Ntawagaragaza neza aho bigarukira, ariko icy’ingenzi hari aho bigera bigahura n’ibindi bitameze neza bikivanga, bikabigabanyiriza ubushyuhe.”

Ibyo bicu bigabanyirizwa cyangwa byoroherezwa ubushyuhe ni ibiba biturutse mu nganda zikomeye twavuze ruguru aho mu nyandiko yacu.

Ikigo cya Leta gishinzwe kubungabunga ibidukikije, REMA ntigihwema gukora ubukangurambaga mu baturage kibigisha gukoresha neza ubutaka bwabo, kurinda amashyamba bakajya batema ibiti bikuze kandi babiherewe urushya.

Kugeza ubu muri mibare igaragzwa na banki y’isi, yerekana ko u Rwanda rufite uruhare rugana na 0.003% by’imyuka ihumanya rwohereza mu kirere.

Gaston Rwaka