Connect with us

Hi, what are you looking for?

Ibidukikije

Kigali: Bifuza uburyo bw’imicungire y’imyobo ifata amazi hakumirwa ibyanduza amasoko y’imigezi

Bamwe mu batuye mu Mujyi wa Kigali, bavuga ko bagihanganye n’ikibazo cyo kubona amazi meza, mu gihe hirya no hino hakigaragara za ruhurura, imisarani icukurwa ku bwinshi ndetse n’imyobo yagenewe gufata amazi, ariko bititabwaho ku buryo byaba indandaro yo kwanduza amasoko y’amazi bakoreshwa mu buzima bwa buri munsi.

Impungenge aba baturage bafite, bazikuriza ku kuba aho kuviduza imisarane n’iyo myobo yindi, usanga ahubwo yubakirwaho inzu; ibintu ngo bidaha umutekano ubuzima bw’abazituramo.

Kankindi Adrienne, utuye mu Murenge wa Kimironko, mu Kagali ka Nyagatovu, avuga ko ari ibintu bikwiye kurebwaho, kuko Umujyi wa Kigali ukomeza guturwa.

Agira ati “Uko bucya bukira Kigali iraturwa, njye maze imyaka 28 ntuye muri aka gace, ariko uko nahaje hameze si ko hakiri, harahindutse cyane, inzu zirahekeranye kandi uko zubakwa ni nako hacukurwa imyobo, yaba iy’imisarane n’ifata amazi ngo tudasenyerana. Iyo yose rero ni imyanda twibanira na yo, nkeka ko bikomeza kwanduza ya masoko y’amazi dukoresha akiri na macye, inzego bireba zikwiye kubishyiramo imbaraga, hakagira igikorwa bigakosorwa.”

Umwuka uturuka mu myobo y’imisarani n’iyubakiwe gufata amazi mabi, na wo uri mu bibangamira ubuzima bw’abatuye mu bice bimwe by’Umujyi wa Kigali, nk’uko babigarukaho.

Murwanashyaka Esdras, utuye mu Murenge wa Kimisagara, agira ati “Bamwe ukuntu dutuye ubwabyo bidushyira mu kaga, kuko ntiduhumeka neza. Reba nko kuba ukikijwe n’umusarani n’icyobo kijyamo amazi mabi yose urugo rukoresha kandi mutuyemo muri benshi, ku ruhande rw’inzu hamanukira na ruhurura; tubyumva cyane muri ibi bihe by’imvura ubundi, kuko byose bihurira mu mazi. Ubuyobozi bukwiye kudufasha, tukagira icyo tubikoraho rwose.”

Imwe muri za ruhurura zitembamo amazi yuzuye imyanda mu Mujyi wa Kigali

Akomeza avuga ko ari ibintu bisaba ubushobozi, bityo ko umuturage akwiye kwegerwa akabifashwamo mu rwego rwo kurengera ubuzima.

Ati “Tuvuga ko amazi ari ubuzima, ntacyo twakora atabonetse kandi ncyeka ko kuyabona na bwo yanduye, byashyira ubuzima mu kaga kurushaho. Rero njyewe nasaba, nk’uko hari ingamba nyinshi zigamije kurengera ubuzima bwa muntu, hakabayeho n’ubukangurambaga mu batuye Umujyi wa Kigali, kubungabunga iyo myobo buri wese akabigira ibye, twirinda ingaruka zirimo n’uko kwanduza amasoko y’amazi dukoresha.”

Hakomeje ibikorwa byo kubaka imiyoboro, izafasha kongera amazi atunganywa n’inganda, WASAC ikaba ibikora mu mishinga minini yo kongera amazi mu Mujyi wa Kigali, ku buryo mu mwaka wa 2023, azaba agera ku bawutuye n’abo mu nkengero zawo; binyuze mu kongerera ubushobozi uruganda rwa Nzove, ubu rufite ubushobozi bwo gutunganya metero kibe ibihumbi 115 ku munsi.

Iyo myobo ishobora guteza inkangu

Bamwe mu mpuguke mu by’ibidukikije, bavuga ko mu gihe imisarane n’ibyobo bishyirwamo amazi yanduye byaba bikomeje gucungwa nabi, bishobora gukururira imijyi imwe n’imwe kurigita, kubw’ubucucike bw’abayituye.

Ku ruhande rw’Umujyi wa Kigali, ngo bishobora gutera inkangu zikomeye bitewe n’ubuhaname bwawo, ndetse bikanagira ingaruka ku mazi abantu bavoma.

Icyobo cyacukuriwe gufata amazi y’imvura n’ayakoreshejwe imirimo y’urugo

Jerome Tuyisingize, impuguke mu bidukikije, avuga ko mu gihe ibi byakomeza gutyo ndetse bikirengagizwa ntibinashakirwe umuti, byateza akaga karimo inkangu no kwanduza amazi.


Yagize ati “Abacukuye icyobo ntibagitere sima, ku buryo cyakuzura bakavidura, iyo hagiyemo umwanda cyangwa ayo mazi, hari akomeza kugenda yinjira akagera aho agera ku ma ‘couches’ agakomeza akagera no ku masoko y’amazi abantu bavoma akandura. Icyobo kiranywa, kikagera igihe kirenza ubushobozi bwo kuba ubutaka bwafata amazi; icyo gihe rero kwika birashoboka bitewe n’imiterere y’ubutaka, wenda nko mu Rwanda biragoye kubera ko Umujyi uri ku gasozi, igishobora kubaho ni inkangu.”

Abatuye Umujyi wa Kigali, bakangurirwa kwitabira ibikorwa byo kuviduza imisarane n’iyo myobo yindi, aho kubakiraho inzu, bigaragara ko nta mutekano uhagije abazituramo baba bafite.

Umukozi w’Umujyi wa Kigali ushinzwe imicungire n’imitunganyirize y’imyanda, Mugabo John, avuga ko gahunda ihari ubu ari uko abaturage bagomba kujya baviduza ibyobo aho kubyubakiraho.

Agira ati “Icyo twasaba abantu, ni uko bareka gufunga imisarani ngo bayubakireho indi, kuko kampani ziyividura zirahari, aho imyanda ijya harahari n’igiciro bakoresha kiba kizwi. Umuntu niba yubatse uyu munsi, akaba afite umusarani, hari kampani dufite zigera muri 6 zikorera mu Mujyi wa Kigali, zifite uburenganzira bwo kuyividura.”

Mu gihe hakomeza ibikorwa byo gucukura imyobo ifata amazi mu Mujyi wa Kigali, ibyago birimo inkangu zihitana ubuzima bw’abantu zakwiyongera, nk’uko ukomeza guturwa. Ubuyobozi butangaza ko mu myaka 5 ishize, Kigali yari ituwe n’abantu miliyoni 1300 000, abiyongereye bakaba babarirwa muri miliyoni 1,6 kugeza ubu; Biteganywa ko mu mwaka wa 2050, uyu Mujyi uri ku buso bwa kilometero kare 731, uzaba utuwe n’abagera kuri miliyoni 3,8.

UMUBYEYI Nadine Evelyne

Click to comment

Leave a Reply

Your email address will not be published.

Izindi wakunda

PanoramaTV Rwanda

https://www.youtube.com/watch?v=BgBhZVIypEs

Click here to Follow our YouTube Channel

Advertisement

Address:

KG 17 Av 37
Remera-ARJ/RMC House
Amahoro National Stadium
Registration Number: RMC/C/14/015
Accreditation: RURA/ICT/LIC/210181745

e-mail: editor.panorama.rw@gmail.com; panoramarw@gmail.com

Tel: 0788300359 -0733003020

Twitter: @PanoramaNewspa1; @reneanthere
Facebook: Panorama Newspaper

Services:

Panorama Newspaper, Animation, Conducting Community debates, Organizing Talk shows, Consultancy in Media, Photography, Newsletters, Magazines, Videos, Documentaries, Translation, Editing, Book publishing, Motion picture, video and television programme production activities, Motion picture, video and television programme postproduction activities
Motion picture, video and television programme distribution activities, Motion picture projection activities, Other information service activities n.e.c.
Other publishing activities, Publishing of newspapers, journals and periodicals
Radio broadcasting, Television programming and broadcasting activities

Copyright © 2021 Panorama.