Connect with us

Hi, what are you looking for?

Inkuru nyamukuru

Kigali: Hatangiye gahunda yo gukingira COVID-19 mu bigo by’amashuri

Kuri uyu wa kabiri mu Mujyi wa Kigali, hatangiye igikorwa cyo gukingira abangavu n’ingimbi biga mu mashuri abanza n’ayisumbuye. Ni Gahunda ije nyuma y’uko hemejwe ko abana bari mu kigero cy’imyaka 12-18, na bo bagiye gukingirwa COVID-19.

Iki gikorwa cyatangiriye mu Bigo bitatu byo muri Kigali; Abakingiwe bakaba bavuze ko urukingo bari barutegereje cyane, kuko bari barwitezeho ubudahangarwa, bagakomeza ubuzima busanzwe nta mpungenge zo kuba bahitanwa na COVID-19.

Niyomukunzi Milliam yiga mu Kigo cy’Ishuri cya ‘Groupe Scolaire Kagugu Catholique’ mu mwaka wa 3, ni umwe mu bakingiwe. Yavuze ko yishimiye urukingo yahawe, kuko ariyo ntwaro ya mbere yo kurwanya COVID-19.

Yagize ati “Ndumva nishimye kuba nahawe urukingo, kuko rugiye kunyongerera ubudahangarwa mu mubiri wanjye; kandi ndagira inama bagenzi banjye, yo gukunda uru rukingo kandi nkanabibutsa ko bibareba bose, ko ari bo bifitiye inyungu.”

Ugirimana El Shadah na we ni umunyeshuri wo muri icyi Kigo, yavuze ko anyuzwe n’urukingo yahawe kuko yumva bizatuma batongera kudindira mu myigire yabo.

Ati “Ndumva nyuzwe kubera nakingiwe, kuko byampaye icyizere cy’uko ninitwararika ntazandura COVID-19, kandi ndumva nizeye ko tutazongera kudindira mu myigire yacu.”

Yakomeje agira inama bagenzi be, ko batagomba kwirara ahubwo bakwiye kuba aba mbere mu kurwanya icyi cyorezo.

Nzabonariba Déo ni umubyeyi ufite umwana urererwa muri ‘Groupe Scolaire Kagugu Catholique’, avuga ko acyumva ko bagiye gukingira abana yabyishimiye; ndetse ahita yemerera umwana we kuzikingiza, cyane ko na we yikingije ngo kandi azi umumaro w’uru rukingo.

Yagize ati “Nkimenya ko bagiye gukingira abanyeshuri biga mu mashuri yisumbuye byaranejeje, kuko najyaga ngira impungenge z’uko umwana wanjye yazandura ‘Corona virus’, bitewe n’uko abanyeshuri bahura ari benshi kandi baturutse henshi hatandukanye. Ndagira inama ababyeyi bose bafite umutimanama, ko bakwiye gushyigikira iki gikorwa, kuko buri umwe bimufitiye umumaro.”

Umuyobozi w’iri shuri rya ‘Groupe Scolaire Kagugu Catholique’, Habanabashaka Jean Baptiste, avuga ko iki gikorwa ari ingenzi cyane.

Ati “Gukingirwa kuri aba banyeshuri ni ingenzi cyane, kuko umwarimu najya imbere y’abanyeshuri akingiye ndetse na bo barakingiwe, twese tuzaba tubyina intero imwe.”

Yashimiye kandi ababyeyi bemeye ko abana babo, barererwa muri icyi Kigo, bakingirwa; Kandi bakaba banabyumvisha abana babo. Aboneraho no gutanga inama ku batarumva ko uru rukingo ari ngombwa, ababwira ko buri wese akwiye kubyumva, kuko rufitiye akamaro ubuzima bwa buri wese.

Ati “Ndashimira byimazeyo ababyeyi bose bemeye gusinyira abana babo, ndetse bakabumvisha ikiza cy’uru rukingo, kandi ndagira inama buri wese ko agomba kubyumva kuko twese nitubyumva kimwe, COVID-19 tuzayitsinda.”

Biteganyijwe ko muri uru rwunge rw’amashuri hazakingirwa abanyeshuri basaga ibihumbi 2,664, bari mu cyiciro cy’imyaka 12 kugera kuri 18.

Gutsinda COVID-19 ni uruhare rwa buri wese

Umuyobozi w’ishami ry’ubuzima n’imibereho myiza mu Karere ka Gasabo, Rutarindwa Alphonse, yavuze ko kugira ngo icyorezo cya ‘Corona virus’ gitsindwe, atari igikorwa cy’umuntu umwe; ahubwo buri wese akwiye kubigiramo uruhare.

Ati “Icyi cyorezo kugitsinda si igikorwa cy’umuntu umwe, ahubwo buri wese akwiye kubigiramo uruhare yikingiza, kuko ari yo ntambwe ya mbere y’ubwirinzi rusange no kugitsinda. Turashishikariza ababyeyi bafite abana, bafite guhera ku myaka 12 kuzamura, ko bakwiye kubashishikariza kwikingiza, kandi n’ababyeyi ubwabo batarakingirwa bakagana Ibigo Nderabuzima, bakajya kwikingiza; kuko ari yo nzira ishoboka, yo guhangana na Corona virus.”

Yongeyeho ko akangurira abaturage gukomeza gukurikiza ingamba zihashya icyi cyorezo, kuko kwikingiza bidakuraho ko umuntu atacyandura; ariko n’ubwo byaba ataremba, kuko aba yarongerewe ubudahangarwa bw’umubiri mu rukingo.

Abanyeshuri bemerewe gukingirwa, bategereje guhabwa urukigo

Uyu muyobozi yavuze ko biteganyijwe ko mu Karere ka Gasabo hazakingirwa abangavu n’ingimbi bagera ku bihumbi 50,63, bakiri mu cyiciro kuva ku myaka 12 kugera 18.

Ibigo 3 byo mu Mujyi wa Kigali: ‘Groupe Scolaire Kagugu Catholique’ iri mu Karere ka Gasabo, ‘College Saint Andre’ yo muri Nyarugenge na ‘Groupe Scolaire Gahanga’ iherereye mu Karere ka Kicukiro; Ni byo byatangirijwemo iyi gahunda yo gukingira abanyeshuri, ikazakomeza no mu yandi mashuri uko byateguwe.

Ibyimanikora Yves Christian

Click to comment

Leave a Reply

Your email address will not be published.

Izindi wakunda

PanoramaTV Rwanda

https://www.youtube.com/watch?v=BgBhZVIypEs

Click here to Follow our YouTube Channel

Advertisement

Address:

KG 17 Av 37
Remera-ARJ/RMC House
Amahoro National Stadium
Registration Number: RMC/C/14/015
Accreditation: RURA/ICT/LIC/210181745

e-mail: editor.panorama.rw@gmail.com; panoramarw@gmail.com

Tel: 0788300359 -0733003020

Twitter: @PanoramaNewspa1; @reneanthere
Facebook: Panorama Newspaper

Services:

Panorama Newspaper, Animation, Conducting Community debates, Organizing Talk shows, Consultancy in Media, Photography, Newsletters, Magazines, Videos, Documentaries, Translation, Editing, Book publishing, Motion picture, video and television programme production activities, Motion picture, video and television programme postproduction activities
Motion picture, video and television programme distribution activities, Motion picture projection activities, Other information service activities n.e.c.
Other publishing activities, Publishing of newspapers, journals and periodicals
Radio broadcasting, Television programming and broadcasting activities

Copyright © 2021 Panorama.