Ikipe ya Mukura Victory Sports et Loisirs, yatsinze APR FC igitego 1-0, mu mukino wa Shampiyona y’icyiciro cya mbere, w’umunsi wa gatandatu utarabereye igihe.
Ni umukino watangiye ku wa 31 Mutarama 2022, uza gusubikwa ugeze ku munota wa 45 w’igice cya mbere, kubera imvura nyinshi yagwaga i Kigali ubwo bakinaga, muri Stade ya Nyamirambo. Ikipe ya Mukura yari yamaze kubona igitego, cyatsinzwe Nyarugabo Moise, ku munota wa 31 w’umukino.
Uyu mukino wasubukuwe kuri uyu wa 01 Gashyantare, hakinwa iminota 45 y’igice cya kabiri yari isigaye, n’indi 7 y’inyongera, ariko ntibyagira icyo bitanga ku ikipe ya APR FC yari yabanjwe igitego; kugeza ubwo umukino warangiraga, ari intsinzi ya Mukura.
Ikipe ya APR FC itsinzwe uyu mukino, nyuma y’aho yari imaze imikino 50 idatsindwa muri Shampiyona y’u Rwanda, kuva umutoza Muhammed Adil Elad yatangira kuyitoza mu 2019, aka gahigo kakaba kakuweho na Mukura Victory Sports et Loisirs.
RUKUNDO Eroge
