Connect with us

Hi, what are you looking for?

Amateka

“Tubahanze amaso ngo mukomeze kubungabunga uwo murage w’Ubunyarwanda buzira kuzima” Perezida Kagame

Ubu ni ubutumwa Nyakubahwa Perezida Paul Kagame yageneye urubyiruko, kuri uyu Munsi w’Intwari wizihijwe habaho igikorwa cyo kunamira ababaye Intwari z’u Rwanda. Mu muhango wabereye ku gicumbi cy’Intwari, giherereye i Remera mu Mujyi wa Kigali, Perezida wa Repubulika na Madamu Jeannette Kagame, bashyize indabo kuri iki gicumbi.

Ni mu kwizihiza Umunsi w’Intwari, kuri uyu wa Kabiri, tariki ya 1 Gashyantare 2022, aho Perezida Kagame yagarutse ku butumwa bwo gushyikira ibikorwa byazo no kuzirata ibigwi.

Perezida Kagame yibukije urubyiruko ko ari rwo Igihugu gihanze amaso, bityo bagomba guharanira kuba Abanyarwanda bazima.

Ati “Rubyiruko rwacu, tubahanze amaso ngo mukomeze kubungabunga uwo murage w’Ubunyarwanda buzira kuzima.”

Umunsi w’Intwari wizihijwe ku nshuro ya 28, Abanyarwanda bazirikana insanganyamatsiko igira iti ‘Ubutwari mu Banyarwanda, Agaciro kacu’.

Ni umuhango wayobowe na Perezida Kagame wari kumwe na Madamu Jeannette Kagame, aho bageze ku Gicumbi cy’Intwari baherekejwe n’abandi bayobozi, mu nzego nkuru z’Igihugu. Uyu munsi witabiriwe kandi n’abahagarariye imiryango y’intwari, ndetse n’abahagarariye Ibihugu byabo mu Rwanda.

Mbere yo kunamira izi Ntwari, habanje kuririmbwa indirimbo yubahiriza Igihugu; Yakurikiwe n’umuhango wo gushyira indabo ku Gicumbi cy’Intwari, ndetse no gufata umunota wo kuzibuka.

Perezida Kagame na Madamu Jeannette Kagame, bunamira Igicumbi cy’Intwari

Indabo zashyizwe ku gicumbi cy’intwari, zo mu cyiciro cy’Imanzi, zibarirwamo Umusirikare utazwi, uhagarariye abasirikare bose baguye ku rugamba, barwanirira Igihugu. Harimo kandi intwari Maj Gen Fred Gisa Rwigema, wayoboye urugamba rwo kubohora Igihugu, mu minsi ya mbere.

Igicumbi cy’intwari ziri mu cyiciro cy’Imena, na zo zashyiriweho indabo; ni ikiciro kibarizwamo Umwami Mutara III Rudahigwa, Rwagasana Michel, Uwilingiyimana Agathe, Niyitegeka Felicité n’Abanyeshuri b’i Nyange, bagaragaje ubutwari bwabo mu 1997, ubwo abacengezi babacagamo ibice ariko bo bakanga kwitandukanya.

Abinyujije ku mbuga nkoranyambaga, Perezida Kagame yatanze ubutumwa, avuga ko hazirikanwa ubuzima bw’Intwari z’u Rwanda zitanze, kugira ngo Abanyarwanda bose babe bafite Igihugu bishimira.

Yagize ati “Umunsi Mwiza w’Intwari! Turazirikana ubuzima bw’Intwari z’u Rwanda; abagabo n’abagore bitanze ngo dushobore kubaka Igihugu gishyize hamwe, kandi gifite agaciro dufite ubu. Ibi ni umwenda ukomeye kuri buri wese muri twe; dukore duharanira icyateza imbere Igihugu cyacu.”

Urubyiruko rusabwa guharanira ubutwari

Umuyobozi Wungirije, w’Urwego rw’Igihugu rushinzwe imidali y’Igihugu n’impeta by’ishimwe, Godeliève Mukasarasi, yavuze ko iyi nshuro kuzirikana ubutwari byahawe umwihariko wo gushishikariza urubyiruko, gukora ibikorwa by’ubutwari.

Yagize ati “Ubutwari bw’Abanyarwanda ni agaciro kacu, ariko cyane cyane urubyiruko rukagira bya bikorwa by’ubutwari, kuko ari bo ejo bazaba barimo abayobozi bitangira Igihugu, ndetse bakanoza imikorere y’Igihugu.”

Ingabo z’Igihugu na zo zahaye icyubahiro Intwari zitangiye u Rwanda

Kuva mu mwaka wa 1999, Umunsi w’Intwari wizihizwa buri mwaka ku tariki ya 1 Gashyantare. Muri uyu mwaka wa 2022, uyu munsi wizihijwe ku nshuro ya 28, aho Abanyarwanda bazirikanye ku bikorwa by’ ubutwari, bikwiye gukomeza bihesha buri wese agaciro n’Igihugu muri rusange.

UMUBYEYI Nadine Evelyne

Click to comment

Leave a Reply

Your email address will not be published.

Izindi wakunda

PanoramaTV Rwanda

https://www.youtube.com/watch?v=BgBhZVIypEs

Click here to Follow our YouTube Channel

Advertisement

Address:

KG 17 Av 37
Remera-ARJ/RMC House
Amahoro National Stadium
Registration Number: RMC/C/14/015
Accreditation: RURA/ICT/LIC/210181745

e-mail: editor.panorama.rw@gmail.com; panoramarw@gmail.com

Tel: 0788300359 -0733003020

Twitter: @PanoramaNewspa1; @reneanthere
Facebook: Panorama Newspaper

Services:

Panorama Newspaper, Animation, Conducting Community debates, Organizing Talk shows, Consultancy in Media, Photography, Newsletters, Magazines, Videos, Documentaries, Translation, Editing, Book publishing, Motion picture, video and television programme production activities, Motion picture, video and television programme postproduction activities
Motion picture, video and television programme distribution activities, Motion picture projection activities, Other information service activities n.e.c.
Other publishing activities, Publishing of newspapers, journals and periodicals
Radio broadcasting, Television programming and broadcasting activities

Copyright © 2021 Panorama.