Ikigo cy’Igihugu cy’Ubuzima cyatangaje ko u Rwanda rufite inkingo za COVID-19 zihagije, ku buryo rwizeye kugera ku ntego yo gukingira byibura 70% y’abaturage, mbere y’igihe cyagenwe n’Ishami ry’Umuryango w’Abibumbye ryita ku Buzima_OMS.
Ni mu gihe abakurikiranira hafi iby’iki cyorezo, bemeza ko gukingira abantu benshi bizatuma COVID-19 icika intege, igasigara imeze nk’ibicurane bisanzwe.
Umwaka ushize wa 2021, wangiye Afurika ari wo mugabane uri inyuma y’iyindi, mu gutanga urukingo wa COVID19; kuko 9% gusa mu Bihugu byawo, aari bo bonyine bakingiye ababituye mu buryo bwuzuye, nyamara intego y’Ishami ry’Umuryango w’Abibumbye ryita ku Buzima, yari ugukingira byibura 40%.
Umuyobozi wa gahunda y’ikingira, mu Kigo cy’Igihugu cy’Ubuzima_RBC, Sibomana Hassan, yatangaje ko u Rwanda rwari rwaragiranye amasezerano na COVAX nk’ ubufatanye bw’Ibihugu, kugira ngo buri cyose gishobore byibuze kuba cyabona inkingo.
Yagize ati “Twari twemerewe ko tugomba kubona byibuze miliyoni 7, muri uyu mwaka urangiye kugeza mu kwezi kwa 12. Iyo ntego bayigezeho kuko baduhaye inkingo zirenga miliyoni 7, mu gihe twari twiteze miliyoni 7 gusa; Igihugu na cyo cyashyizemo ubushobozi, kuko umwaka urangiye cyarashoboye kugura byibuze doze miliyoni 4, ndetse kubera uburyo Igihugu cyacu kibanye neza n ‘ibindi, twagiye tubona impano nyinshi z’inkingo ku buryo kugeza ubu, dufite izihagije. Abamaze guhabwa urukingo rumwe, urukingo rwabo rwa kabiri turarufite, ntabwo dutegereje ko ruzava hanze, n’abategereje urushimangira izo nkingo, na zo zirahari.
Mu butumwa aherutse kugenera abatuye Isi, Umuyobozi w’Ishami ry’Umuryango w’Abibumbye ryita ku Buzima, Dr. Tedros Adhanom Ghebreyesus, yagaragaje ko kurandura COVID-19 muri uyu mwaka wa 2022 bishoboka, ngo ariko birasaba ko buri Gihugu gikingira byibura 70% by’abagituye.
Intego yo gukingira 70% bitarenze muri Kamena 2022, ngo u Rwanda rurayikozaho imitwe y’intoki, kuko inkingo zihari. Aha ni naho umuyobozi wa Gahunda y’Ikingira muri RBC, ahera asaba buri wese utarafata urukingo, kwihutira kurufata.
Sibomana Hassan agira ati “Ikindi ntabwo bihagije kuba dufite inkingo, hari icyo na none abaturage basabwa. Icyo basabwa ni uko bagomba kwitabira kuzifata, kubera ko kuba zihari ni kimwe no kuzitanga ni ikindi; zigomba kugira abo zihabwa. Abantu nibarusheho kubyumva, bumve impamvu y’inkingo.”
Abakurikiranira hafi iby’icyi cyorezo, bemeza ko uko umubare w’abakingiwe urushaho kwiyongera ari na ko COVID-19 igenda icika intege, ku buryo bishobora kurangira ibaye nk’ibicurane bisanzwe.
Uretse u Rwanda, muri Afurika, Ibihugu bya Seychelles, Mauritius, Maroc, Tunisia, Cabo Verde na Botswana, na byo byasoje umwaka wa 2021 byesheje umuhigo wo gukingira byuzuye 40% ndetse ibihugu bya Seychelles na Mauritius byo byamaze no kwesa umuhigo wo gukingira 70% y’ababituye bose.
Nkubiri Robert
