Ku wa mbere tariki ya 15 Werurwe 2021, abanyamakuru, abarimu bo muri Kaminuza n’abacururiza mu isoko rya Gahanga mu karere ka Kicukiro, ni ibyiciro byagezweho mu guterwa urukingo rwa COVID-19.
Abantu 257,449 bamaze guterwa urukingo rwa COVID-19, hibanzwe ku bari mu cyiciro cy’abarusha abandi ibyago byo kwandura, nk’uko bivugwa na minisiteri y’ubuzima.
Bamwe mu banyamakuru bakingiwe kuri Kigali Arena batewe urukingo rwa Pfizer, nk’uko umunyamakuru wa BBC i Kigali abivuga.
Abakingiwe bakurikiye ibyiciro byakingiwe mu cyumweru gishize birimo abashoferi b’amakamyo, ab’imodoka za rusange zitwara abantu, abakorera ibigo bicunga umutekano byigenga, abanyerondo, abakozi bo mu nganda n’abandi bakingiwe mbere.
Nyuma yo gukingirwa, umunyamakuru wa BBC avuga ko aho abakingiwe baruhukira bakurikiranwa mu gihe cy’iminota 15 nta kidasanzwe cyahabonetse kugeza bahasohotse. Avuga ko muri rusange abari bamaze gukingirwa bariho baganira bavuga ko bishimiye gukingirwa.
Akomeza avuga ko bigoye kumenya niba hari uwatewe ikibazo n’urukingo yahawe kuko buri wese nyuma yo gukingirwa agenda ukwe
Kuva icyorezo cya COVID-19 cyagera mu Rwanda ku wa 14 Werurwe 2020 kugeza ku wa 14 Werurwe 2021, nk’uko bitangazwa na Minisiteri y’ubuzima, abanduye bagera ku 20,186; abakize bagera ku 18,566; abamaze guhitanwa na cyo bagera 280 mu gihe ibipimo bimaze gufatwa ari 1,062,907. Abamaze gukingirwa kuva ku wa 5 kugeza ku wa 14 Werurwe 2021 bagera ku 257, 449.
Nkubiri B. Robert
