Panorama
Ku wa gatanu, tariki 28 Kamena 2024, Ambasaderi Christophe Bazivamo yashyikirije Perezida wa Burkina Faso, Nyakubahwa Capitaine Ibrahim Traoré, impapuro zimuhesha uburenganzira bwo guhagararira u Rwanda muri icyo gihugu nk’Ambasaderi, ufite icyicaro Abuja muri Nigeria.
Uyu muhango wabereye mu ngoro y’Umukuru w’Igihugu mu murwa mukuru wa Burkina Faso, Ouagadougou.
Muri uyu muhango, Ambasaderi Christophe Bazivamo, yakiriwe na Capitaine Ibrahim Traoré, bagirana ibiganiro byibanze ku guteza imbere umubano mwiza usanzwe hagati y’ibihugu byombi n’uburyo ubuhahirane hagati y’abaturage burushaho gutezwa imbere, cyane ko urujya n’uruza hagati y’u Rwanda na Burkina Faso rudasaba visa.
Ibihugu byombi, u Rwanda na Burkina Faso, bisanzwe bifitanye umubano ushingiye ku mikoranire myiza muri dipolomasi, ubukungu, imigenderanire n’ibindi.
