Panorama Sports
Abanyamuryango ba FC Barcelona bemeje ko Joan Laporta i Estruch akomeza kuyobora iyi kipe nyuma yo gutsinda amatora yabaye ku Cyumweru. Kandidatire ye yiswe “Defensem el Barça” yatsinze ku amajwi 32,934 by’abatoye, bingana na 68.18%.
Laporta agiye kuyobora iyi kipe ku nshuro ya kane. Mbere yayoboye FC Barcelona hagati ya 2003 na 2010, hanyuma yongera gutorerwa kuyiyobora muri Werurwe 2021, aho yari yabonye amajwi 30,184 (54.28%).
Nyuma y’imyaka itanu ishize amatora aheruka, Laporta yongeye gutsinda, atsinze uwo bari bahanganye ari we Víctor Font, wabonye amajwi 14,385 (29.78%). Hari kandi amajwi 984 yatowe nta mukandida ahitamo (2.04%).
Nyuma yo gutangaza ibyavuye mu matora, Laporta yagize ati: “Ibi ni ibisubizo bikomeye cyane biduha imbaraga nyinshi. Bituma tudahagarikwa. Nta muntu uzaduhagarika. Imyaka iri imbere izaba ishimishije cyane, kandi izaba ari imwe mu myiza mu buzima bwacu.”
Yanongeyeho ko FC Barcelona ari ikipe idasanzwe ku isi kuko ari abanyamuryango batora Perezida n’inama y’ubuyobozi.
Yagize ati:“Ndashimira cyane abanyamuryango baje gutora. Byari ibyishimo bya demokarasi nu gushira hamwe kw’abanyamuryango. Ndashimira kandi abayobozi n’abakozi bakoze akazi keza mu gutegura amatora.”
Joan Laporta yavukiye i Barcelona ku wa 29 Kamena 1962. Ni Perezida wa mbere wa FC Barcelona watowe mu buryo bwa demokarasi uyoboye iyi kipe mu bihe bibiri bitandukanye.
Yize amategeko muri University of Barcelona, anabona impamyabumenyi y’icyiciro cya kabiri cya kaminuza mu mategeko y’amasosiyete n’imisoro muri Instituto de Estudios Superiores Abat Oliba.
Ni umwe mu bashinze sosiyete y’abanyamategeko Laporta & Arbós Advocats Associats, akaba n’umunyamuryango wa Barcelona Bar Association. Afite kandi indi mirimo mu miryango itandukanye irimo Lluch Foundation n’iyitwa Johan Cruyff Welfare Foundation.
