Panorama
U Rwanda n’u Bubiligi byemeranyije gusubukura umubano w’ibihugu byombi ushingiye kuri Dipolomasi, nyuma y’ibiganiro byabaye mu bihe bitandukanye bigamije gukemura ibibazo byari byarateje kutumvikana hagati y’ibihugu byombi.
Byashyizwe ahagaraga binyujije mu itangazo rihuriweho ryashyizwe ahagaragara ku wa 22 Nzeri 2026 na Minisitiri w’Ububanyi n’Amahanga n’Ubutwererane w’u Rwanda, Amb. Olivier J.P. Nduhungirehe na Visi Minisitiri w’Intebe akaba na Minisitiri w’Ububanyi n’Amahanga, Ibikorwa by’u Burayi n’Ubutwererane Mpuzamahanga w’u Bubiligi, Maxime Prévot.
Ibihugu byombi byemeranyije ko mu gihe cya vuba Ambasade y’u Rwanda mu Bubiligi n’iy’u Bubiligi mu Rwanda zizongera gufungurwa, hashingiwe ku ngingo ya kabiri y’Amasezerano y’i Vienne agenga umubano ushingiye kuri dipolomasi.
Ku ikubitiro, buri Ambasade izayoborwa by’agateganyo na Chargé d’Affaires izaba ahagarariye Ambasaderi, afatanyije n’umudipolomate cyangwa consul ndetse n’itsinda rito ry’abakozi ba tekiniki.
Nyuma hazatangwa ubusabe bwo kwemeza ba Ambasaderi bashya, mu rwego rwo gusubukura ibikorwa bya dipolomasi mu buryo bwuzuye. Ambasaderi w’u Rwanda mu Bubiligi azaba anashinzwe umubano n’Umuryango w’ubumwe bw’u Burayi.
Itangazo rihuriweho rivuga ko mu biganiro byabayeho mu bihe bitandukanye, impande zombi zaganiriye mu buryo bwubaka ku ngingo zari zarateje kutumvikana no kutabona ibintu kimwe.
Ku wa 17 Werurwe (03) 2025, u Rwanda rwari rwafashe umwanzuro wo guhagarika umubano wa dipolomasi n’u Bubiligi, runategeka abadipolomate b’iki gihugu kuva mu gihuhu mu gihe kitarenze amasaha 48. U Rwanda rwavuze ko iki cyemezo cyafashwe nyuma yo kugitekerezaho mu buryo bwimbitse, ruvuga ko cyari gishingiye ku myitwarire y’u Bubiligi ya gikoloni.
U Rwanda n’u Bubiligi byashimiye ubuyobozi bwa Leta ya Qatar ku korohereza inama ya mbere yahuje aba Minisitiri bombi, yabereye i Doha muri Kamena (06) 2025.
Ibihugu byombi byashimangiye kandi ubushake bwo gukomeza ibiganiro bivugisha ukuri kandi biboneye, nubwo byemera ko hakiri ibibazo bimwe byo ku rwego mpuzamahanga bitumva kimwe.
Ibihugu byombi byemeranyije ko umubano wabyo mu gihe kiri imbere ugomba gushingira ku kutivanga mu bibazo by’ikindi gihugu, kubahana no gukorana mu buryo bwubaka.
