Sunrise FC, ikipe y’i Nyagatare, Kirehe FC ikipe ya Kirehe ndetse na Bugesera FC y’i Bugesera ni amakipe yose yo mu ntara y’Iburasirazuba, yatangiranye intsinzi ku mukino wa mbere wa Shampiyona y’umupira w’amaguru mu Rwanda.
Ku wa gatandatu tariki ya 15 Ukwakira 2016, Bugesera FC yabimburiye izindi zo mu ntara y’Iburasirazuba yakiriza Kiyovu Sports ibitego 3-0.
Ku cyumweru tariki ya 16 Ukwakira 2016, Sunrise FC itarakiniye ku kibuga cyayo, ni icyo yahawe na Polisi cy’i Gishari FERWAFA ntiyemere ko igikiniraho, yakiriye AS Kigali ku Kicukiro, iyihatsindira igitego 1-0, cyayishyize ku mwanya wa 6.
Uwo munsi Kirehe FC yari yakiriye Musanze FC ku kibuga cyayo i Nyakarambi, yakira umushyitsi wayo n’igitego 1-0.
Ayo makipe yose uko ari atatu yo mu ntara y’Iburasirazuba yinjiranye umuvuduko muri Shampiyona y’umupira w’amaguru mu Rwanda.
Uko imikino yagenze ku munsi wa mbere
Ku wa Gatanu tariki ya 14 Ukwakira 2016, Rayon Sports yatsinze Police FC ibitego 3-0.
Ku wa Gatandatu tariki ya 15 Ukwakira 2016, Pepiniere FC yakiriye Mukura VS yatsindiwe iwayo ibitego 2-1. Etincelles yatsinze Gicumbi FC ibitego 3-2 na ho Bugesera FC inyagira SC Kiyovu ibitego 3-0.
Ku Cyumweru tariki ya 16 Ukwakira 2016, Marines FC yanganyije na Espoir FC 0-0, Sunrise FC itsinda AS Kigali igitego 1-0, Kirehe FC itsinda Musanze FC igitego 1-0, APR FC itsinda Amagaju FC igitego 1-0, umukino wabereye kuri Sitade ya Kigali i Nyamirambo.
Rene Anthere
Abayobozi ba Sunrise FC n’aba AS Kigali bakurikirana umukino.
