Bamwe mu baturage bo mu karere ka Nyagatare bagaragaza ko ikiguzi cyo kubaka mu mujyi kitoroshye, kuko babuzwa kubakisha amatafari ya rukaraka biri mu byatumye uyu mujyi udindira mu iterambere ry’inyubako.
Abaturage bo mu Mujyi wa Nyagatare, umwe mu mijyi yunganira Umurwa mukuru w’igihugu, bavuga ibi mu gihe ikigo cy’igihugu gitsura ubuziranenge (RSB) ku bufatanye n’Ikigo cy’igihugu gishinzwe guteza imbere imiturire (RHA) bari mu bukangurambaga bwo gushishikariza abatuye mu mijyi yunganira Kigali, kubahariza amabwiriza y’ubuziranenge mu kubakisha amatafari ya rukarakara. Ibi bijyanye n’uko itegeko ryemera ko rukarakara zemewe kubakishwa mu gihugu hose uretse inzu zigeretse, insengero n’inyubako z’ubucuruzi.
Kuba itegeteko rinaha ububasha Inama Njyanama y’akarere gukoma uduce tumwe na tumwe hashingiwe ku iterambere ry’akarere, biri mu byagize ingaruka no kubatuye Umujyi wa Nyagatare, kuko Inama Njyanama hari uduce yakomye bigatuma abafite ubushobozi buke batabasha kubaka.
Icyo aba baturage bakomeje guhurizaho ni uko bimwa ibyangombwa mu gihe bashaka kubakisha rukarakara, bagasaba ko bakoroherezwa, kuko badakwiye kubuzwa gutura mu mujyi no kubuzwa uburenganzira bwabo kuko amatafari ya rukarakara yemewe mu gihugu hose.
Ntahompagaze Alphonse ni umuturage wa Nyagatare. Agira ati “kuba batubuza kubakisha rukarakara byatumye tugira ibihombo n’ubukene, kuko tubura ibiraka ariko twumva babyemeye byafasha benshi kuba aho bashaka kandi bishimuye. Hari ahantu utanyura mu masaha y’umugoroba kubera ibisambo byihisha muri ibyo bibanza. Bigira rero ingaruka zikomeye ku buzima bw’abaturage. Twabasaba bagatanga uburenganzira amatafari ya rukarakara akubakishwa, umujyi wacu ugaturwa wose.”
Majyambere John nawe agira ati “Hari abayobozi usanga batari inyangamugayo bemerera benewabo bakubaka, ufite amafaranga akubaka mu manegeka, burya abakire benshi nibo bubaka mu kajagari kuko baba bafite amafaranga yo gutanga kugira ngo babone cya cyangombwa cyo kubaka.”
Uyu muturage akomeza avuga ko kwimwa uburenganzira bwo kubakisha rukarakara bigira ingaruka ku batuye Umujyi wa Nyagatare, aho ibibanza byinshi byabaye indiri y’amabandi.
Wilson Mwesigye, Umuyobozi w’ibiro by’ubutaka mu Karere ka Nyagatare, avuga ko nta muturage w’i Nyagatare wananiwe kubaka kubera ko yagize imbogamizi zo gusabwa kutubakisha rukarakara, kuko bemerewe kuyubakisha imbere mu byumba.
Ati “Ntekereza ko ntawe twabangamiye, ntawigeze aduha imbogamizi y’uko adashoboye kubaka kubera ibwiriza rya Njyanama y’Akarere yo kudakoresha rukarakara, ibyo kuvuga ngo nta mikoro ni ukubeshya, ntabwo tubyemera.”
Avuga ko Inama Njyanama y’Akarere ka Nyagatare yagennye ahantu hatemerewe kubakishwa rukarakara ko uzarenga kuri ayo mabwiriza azahanwa n’amategeko.
Muhire Janvier, Umuyobozi ushinzwe amategeko y’imiturire n’imyubakire muri Rwanda Housing Authority avuga ko Akarere ka Nyagatare kagombye kwicara kakaganira n’abagenerwabikorwa, bakamenya aho imbogamizi ziri n’icyakorwa ngo imiturire imere neza.
Agira ati “Ikibazo ntibagifite kuri rukarakara ahubwo bagifite ku nzego zibishyira mu bikorwa, ntiziruhanye, ntizirushye abaturage, icyuho kiri mu mikoranire.”
Avuga ko bizwi ko hari ibibanza bitubatse biba indiri y’ibisambo, asaba ko abaturage bafashwa kubakisha rukarakara kugira ngo icyo cyuho kirangire.
Agira ati “Ibyo bibanza mu by’ukuri bitubatse mu mujyi turabizi ko ari ikibazo, hari ikibazo ko ari indiri z’abagizi ba nabi, bashobora gukora ibikorwa bitemewe n’amategeko y’u Rwanda, … Nkumva rero kubakisha rukarakara byakemura ibyo bibazo.”
Muhire yongeraho ko amabwiriza y’ubuziranenge ku ikoreshwa ry’amatafari ya rukarakara avuga ko inzu z’ubucuruzi, insengero, umusigiti ndetse n’izigerekeranye zitemewe kubakisha amatafari y’inkarakara.
Ibi byose byagarutsweho ubwo ikigo cy’igihugu gitsura ubuziranenge (RSB) ku bufatanye n’Ikigo cy’igihugu gishinzwe guteza imbere imiturire (RHA) bari mu bukangurambaga bumaze icyumweru ku mabwiriza y’ubuziranenge bw’amatafari ya rukarakara mu mijyi itandatu yunganira Umujyi wa Kigali.
Munezero Jeanne d’Arc
