Ubuyobozi bwa Bugesera bwamennye litiro 76,000 z’inzoga zirimo iyitwa Isano, Agasembuye n’Indege zitujuje ubuziranenge, zose zikaba zarafatiwe mu Mirenge ya Nyarugenge na Nyamata.
Mbere yo kuzimena Tariki 15, Ugushyingo, 2025, ubuyobozi bwabanje gukora ubugenzuzi ku benga inzoga busanga inganda Dusangire Production na EKAM Ltd zakoraga inzoga mu buryo butemewe.
Uruganda Dusangire Production rwamenewe litiro zisaga 62,000 rukorera mu Murenge wa Nyarugenge, Akagari ka Ngenda, Umudugudu wa Kamabare, aho rwengaga inzoga zitwa Isano n’Agasembuye.
Ubuyobozi b’Akarere ka Bugesera, inzego z’umutekano na Rwanda FDA basuraga uru ruganda ngo barebe uko rukora basanze rufite ibitoki byavamo litiro 20 zonyine.
Mu ruganda EKAM Ltd rwenga inzoga yitwa Indege rukorera mu Murenge wa Nyamata, Akagari ka Kayumba, Umudugudu wa Kayenzi, ho nta n’igitoki cy’umuti cyahasanzwe.
Hamenenwe litiro zisaga 14,000, abaruturiye bagaragaje ko batarabona imodoka yinjirana ibitoki, ahubwo babona izisohokana inzoga.
Hemeranyijwe ko ibyafashwe byose bimenwa, izo nganda zigafungwa, ndetse n’izindi nzoga zakozwe ziri gucuruzwa hirya no hino zikamenwa mu rwego rwo kurengera ubuzima bw’abaturage.
Mutabazi Richard uyobora Bugesera yabwiye abaturage ko kumena izo nzoga bigamije kurengera ubuzima bwabo.
Meya Mutabazi aganiriza abaturage ku bubi bw’inzoga nka ziriya
Ati: “Iki ni igikorwa tugomba gukomeza gushyiramo imbaraga. Kurwanya inzoga zitujuje ubuziranenge ni ukurengera ubuzima bw’abaturage bacu no kubungabunga umutekano wabo.”
Yashimiye inzego zose bafatanyije gutahura amakuru y’aho izi nzoga zengerwaga, anakangurira abaturage gukomeza gutanga amakuru ku gihe kugira ngo abenga izo nzoga zahimbwe amazina atandukanye babashe gutahurwa.
Yasabye abacuruzi b’ibinyobwa bitandukanye kubahiriza amategeko, kudahishira ibicuruzwa bikekwa cyangwa bidafite ubuziranenge, ndetse no kwirinda kubicuruza kuko byangiza ubuzima.
Abaturage basabwe kuba maso no kwirinda kunywa inzoga zose babonye mu gihe batazi icyo zikozwemo.
Inzego zishinzwe umutekano zatangaje ko zitazacogora mu kugenzura no kurwanya inzoga zitujuje ubuziranenge, mu rwego rwo gukumira ibyaha zishobora gutera no kubungabunga imibereho myiza y’abaturage.
Amafoto: UMUSEKE.RW
