Urwego Ngenzuramikorere (RURA) rwatangaje ko guhera ku wa 4 Mata 2026 saa kumi n’ebyiri za mu gitondo (6:00 am), ibiciro ntarengwa by’ibikomoka kuri peteroli byahinduwe, bikazakurikizwa ku isoko ry’u Rwanda.
Nk’uko iri tangazo ribigaragaza, igiciro cya lisansi (essence) ntikigomba kurenza amafaranga y’u Rwanda 2,303 kuri litiro, mu gihe mazutu yo itagomba kurenga 2,205 Frw kuri litiro. Ibi biciro bikaba birimo n’umusoro ku nyongeragaciro (VAT).
RURA ivuga ko iri hinduka rishingiye ku mihindagurikire y’ibiciro ku isoko mpuzamahanga, ndetse n’ingamba za Leta zigamije kugabanya ingaruka z’izamuka ry’ibiciro ku rwego rw’isi.
Uretse ibiciro bya peteroli, RURA yanatangaje ko hanavuguruwe ibiciro by’ingendo mu modoka zitwara abagenzi mu buryo rusange, bitewe n’impinduka mu biciro by’ibikomoka kuri peteroli n’ibindi bigira uruhare mu mikorere y’uru rwego.
Mu Mujyi wa Kigali, igiciro cy’urugendo ku muntu kuri kilometero cyashyizwe kuri 59.28 Frw, mu gihe ingendo zo hagati mu ntara (intercity) zashyizwe kuri 41.58 Frw kuri kilometero ku mugenzi.
Ibi biciro bishya by’ingendo biteganyijwe gutangira gushyirwa mu bikorwa ku wa 6 Mata 2026, aho ibisobanuro birambuye ku biciro by’ingendo ku mihanda itandukanye bizajya biboneka ku rubuga rwa RURA.
RURA yakomeje ishishikariza abaturage gutegura neza ingendo zabo, gukoresha imodoka zitwara abagenzi mu buryo rusange no kwirinda ingendo zitari ngombwa, mu rwego rwo kugabanya ikoreshwa rya peteroli.
Yanashimangiye ko izakomeza gukurikirana imigendekere y’isoko, hagamijwe kwemeza ko ibiciro bikomeza kuba bihamye kandi serivisi zitangwa neza ku baturage.
Ibiciro bya paetelori na mazutu byatumbagiye
