Arsenal na PSG yifatanyije n’Abanyarwanda muri ibi bihe bikomeye byo kwibuka ku nshuro ya 32 Jenoside yakorewe Abatutsi muri Mata 1994.
Ikipe ya Arsenal yabitangaje binyuze mu mashusho yatangaje kuri uyu wa Kabiri, yarimo abakinnyi barimo umunyezamu David Raya, myugariro Ben White ndetse na myugariro Jurien Timber wavuze ko bifatanyije n’Abanyarwanda.
Agira ati “Ku nshuro ya 32 twibuka Jenoside yakorewe Abatutsi mu 1994, twunamiye abo yahitanye kandi twifatanyije n’Abanyarwanda.”
Kuva yatangira gukorana n’u Rwanda mu mwaka wa 2018 muri gahunda ya Visit Rwanda binyuze mu Kigo cy’Igihugu cy’Iterambere(RDB), Arsenal buri mwaka yifatanya n”Abanyarwanda mu bihe byo Kwibuka Jenoside yakorewe Abatutsi mu 1994, itanga ubutumwa.
Muri PSG na ho, Kapiteni Marquinhos, Vitinha, Bradly Barcola, Desire Doue ni bo bahagarariye bagenzi babo mu gutanga ubutumwa bwo Kwibuka.
Bavuze ko bifatanyije n’Abanyarwanda baha agaciro abarenga miliyoni imwe bazize uko bavutse ndetse banakomeza abarokotse.
Abo bakinnyi bagize bati “Uyu munsi turibuka ku nshuro ya 32 Jenoside yakorewe Abatutsi mu 1994 mu Rwanda. Twifatanyije n’u Rwanda kwibuka Jenoside yakorewe Abatutsi mu 1994, duha icyubahiro abarenga miliyoni babuze ubuzima, tunifuriza abarokotse gukomera.”
