Perezida Ismail Omar Guelleh yongeye gutsinda amatora y’Umukuru w’Igihugu muri Djibouti ku majwi angana na 97,81%, mu matora aheruka muri icyo gihugu, yabaye ku wa 9 Mata 2026.
Muri ayo matora, yari ahanganye na Mohamed Farah Samatar wabonye 2,19% by’amajwi, nk’uko byatangajwe n’inzego z’itora.
Ismail Omar Guelleh w’imyaka 78 amaze imyaka myinshi ku butegetsi, aho yatangiye kuyobora Djibouti mu 1999. Iyi ntsinzi nshya imwemerera gukomeza indi manda ya gatandatu ayobora iki gihugu giherereye mu ihembe rya Afurika.
Iyi ntsinzi ibaye nyuma y’ivugurura ry’amategeko ryakozwe umwaka ushize, ryakuyeho imipaka y’imyaka ntarengwa ku muntu ushaka kuyobora igihugu, bikaba byarafunguye inzira kuri Guelleh yo kongera kwiyamamaza.
Nubwo akomeje gutsinda amatora ku bwiganze bukomeye, hari impaka n’impungenge mu ruhando rwa politiki n’abasesenguzi ku bijyanye n’igihe kirekire amaze ku butegetsi, bamwe bagaragaza ko gikomeje kuba kirekire mu mateka ya politiki ya Djibouti.
Guelleh agiye kongera kuyobora Djibouti muri manda nshya
