Abakozi b’Ishuri rikuru ry’Imyuga n’Ubumenyingiro (IPRC Ngoma) kuwa 04/07/2020 bashyikirije abarokotse Jenoside yakorewe Abatutsi mu 1994 bo mu karere ka Ngoma amashanyarazi akomoka ku mirasire y’izuba.
Abashyikirijwe aya mashanyarazi ni ingo makumyabiri n’ebyiri (22) zo mu mudugudu wa Rwamibabi, akagari ka Ntovi, Umurenge wa Rukumberi. Umuhango wo kuyabashyikiriza ku mugaragaro ni kimwe mu byaranze ibirori byo kwizihiza Umunsi wo Kwibohora mu murenge wa Rukumberi.
Igikorwa cyo kugeza amashanyarazi ku bagenerwabikorwa cyatwaye amafaranga miliyoni ebyiri n’ibihumbi maganatanu mirongo-itandatu n’umunani (2,568,000 Frw). Aya mafaranga yavuye mu misanzu y’abakozi ba IPRC Ngoma ubwo bari biyemeje gukora iki gikorwa.
Umuyobozi ushinzwe imibereho myiza y’abanyeshuri muri IPRC Ngoma wari uhagarariye ubuyobozi bw’ikigo n’abakozi yavuze ko ahari amashanyarazi haza n’iterambere bityo ngo iki gikorwa cyakozwe mu rwego rwo gukomeza kwibohora ubukene n’izindi nzitizi ku iterambere.
Yavuze ko iki gikorwa kiri mu murongo wa IPRC Ngoma wo gushyigikira abarokotse Jenoside, kubaba hafi no kubafasha mu guhangana n’ingaruka za Jenoside kugira ngo badakomeza guheranwa n’agahinda.
Mu murenge wa Rukumberi, ibice bimwe bigerwamo n’amashanyarazi rusange, naho mu bindi bice ntabwo amashanyarazi ahagera.
Umunyamabanga nshingwabikorwa w’Umurenge wa Rukumberi Ildefonse Mbarushimana yavuze ko kuba umudugudu wa Rwamibabi utaragerwagaho n’amashanyarazi byari imwe mu nzitizi z’iterambere ry’abahatuye.
Yagize ati: “Mu mudugudu wa Rwamibabi, abaturage benshi ntibagiraga amashanyarazi. Kuba twarabonye umufatanyabikorwa IPRC Ngoma tukabona aya mashanyarazi akomoka ku mirasire y’izuba ni ikintu cy’indashyikirwa.”
Yavuze ko mu gihe isi igezemo kuba umuntu yagira igikoresho cy’ikoranabuhanga nka telefoni maze akarinda gukora urugendo ajya gushaka umuriro wayo, ngo biba ari ibibazo bitoroshye.
Muri iki gikorwa ndetse no mu bindi nk’ibi, IPRC Ngoma ifatanya n’Umuryango uharanira inyungu z’abarokotse Jenoside yakorewe Abatutsi mu 1994 (IBUKA) mu gushaka abagenerwa bikorwa bakeneye ubufasha mu buryo bwihutirwa kurusha abandi.
Umuyobozi wa IBUKA mu karere ka Ngoma, Musafiri Jean Pierre, yashimye IPRC Ngoma ku gikorwa cyo gutanga amashanyarazi ku barokotse Jenoside. Musafiri yasabye abagenerwabikorwa gufata neza ayo mashanyarazi birinda gushaka gusana ahavutse ikibazo ahubwo bagahamagara abatekinisiye babishoboye kandi babyemerewe.
Igikorwa cyo gutanga amashanyarazi kibaye igikorwa cya munani IPRC Ngoma ikoze guhera muri 2013, mu bikorwa bya buri mwaka bigamije gushyigikira abarokotse Jenoside batishoboye.
Ibindi bikorwa byakozwe byibanze ahanini mu kubakira abarokotse Jenoside. Ubu iri shuri rikuru rimaze kwubakira abarokotse Jenoside amazu yo guturamo arindwi (yose hamwe) mu mirenge ya Kibungo na Remera.
Panorama.rw
