Panorama Sports
Masengesho Yvonne, Mwamikazi Djazila na Ingabire Diane begukanye imidari ya Zahabu mu byiciro bahagarariye muri Shampiyona Nyafurika y’amagare ibera i Kisumu muri Kenya.
Mu isiganwa ryabaye kuri uyu wa Gatatu tariki ya 21 Ukwakira 2026, buri wese aho yasiganwaga n’ibihe ku giti cye, Masengesho Yvonne yahesheje u Rwanda umudari wa Zahabu mu cyiciro cy’abatarengeje imyaka 19 mu bakobwa.
Mwamikazi Djazila yegukanye umudari wa Zahabu mu gusiganwa mu cyciro cy’abagore/abakobwa bari munsi y’imyaka 23 na ho Ingabire Diane yegukana umudari wa Zahabu mu bakobwa bakuru bitabiriye Shampiona Nyafurika yo gusiganwa ku magare ibera i Kisumu muri Kenya.
Uko irushanwa riteye
Ku wa Gatatu, tariki ya 21 Ukwakira, ni amasiganwa yo gusiganwa n’ibihe buri mukinnyi ku giti cy’umukinnyi, ‘Individual Time Trial’, mu byiciro byose byitabiriye irushanwa.
Abakobwa batarengeje imyaka 19 ni bo babimburiye abandi Saa Mbiri za mu gitondo, ku isaha y’i Nairobi, ubwo hari saa moya ku isaha y’i Kigali, ku ntera ya kilometero 10,2, ari na ho Masengesho Yvonne yegukaniye umudali wa Zahabu.
Abahungu batarengeje imyaka 19 bakurikiyeho basiganwa kilometero 20,4. Harakurikiraho abagore batarengeje imyaka 23 n’abakuru, bose basiganwa ibiilometero 20, abagabo batarengeje imyaka 23 n’abakuru ku ntera y’ibilometero 30,6.
Ku wa Kane, taliki ya 22 Ukwakira, mu gitondo hazaba isiganwa rya Mixed Relay, aho ikipe iba igizwe n’abahungu n’abakobwa, ku ntera y’ibilometero 40,8.
Hazakurikiraho isiganwa ryo mu muhanda ry’abahungu bato, batarengeje imyaka 17, ku ntera y’ibilometero 58,6, abakobwa bakazakora intera y’ibilometero 38,2.
Ku wa Gatanu, taliki ya 23 Ukwakira, abakobwa batarengeje imyaka 19 bazasiganwa mu muhanda ku ntera y’ibilometero 68,8 mu gihe abahungu bo muri icyo kigero bo bazasiganwa intera y’ibilometero 119,8.
Ku wa Gatandatu, taliki ya 24 Ukwakira, hazaba isiganwa ryo mu muhanda ry’abagore n’abatarengeje imyaka 23, rizatangira ku ntera y’ibilometero 122,2.
Shampiyona Nyafurika yo gusiganwa ku magare izasozwa ku Cyumweru, tariki ya 25 Ukwakira, hakinwa isiganwa ry’abagabo n’abatarengeje imyaka 23 ku bilometero 175,2.
