Panorama Sports
Umunyarwandakazi Masengesho Yvonne yahesheje u Rwanda umudari wa Zahabu muri Shampiyona Nyafurika yo gusiganwa ku magare ibera i Kisumu muri Kenya. Yitwaye neza ku munsi wa mbere mu gusiganwa n’ibihe mu bakobwa batarengeje imyaka 19.
Masengesho w’imyaka 18 yegukanye umwanya wa mbere mu isiganwa ry’ibilometero 10,2 ryabaye mu gitondo cyo kuri uyu wa Gatatu, tariki ya 21 Ukwakira 2026.
Uyu mukinnyi yakoresheje iminota 15, amasegonda 37 n’ibice 193, agendera ku mpuzandengo y’umuvuduko wa kilometero 39,181 ku isaha.
Masengesho yasize Umunyamisiri El Sayed Joudy wabaye uwa kabiri akoresheje iminota 15, amasegonda 40 n’ibice 719, amurusha amasegonda atatu n’ibice 526.
Umunya-Ethiopia Gimbato Rahel yaje ku mwanya wa gatatu akoresheje iminota 16, amasegonda umunani n’ibice 730, arushwa na Masengesho amasegonda 31 n’ibice 537.
Iri siganwa ryitabiriwe n’abakinnyi 17 baturutse mu bihugu 12 byo ku mugabane wa Afurika, barimo abo muri Afurika y’Epfo, Algeria, u Burundi, Kenya, Nigeria, Sénégal, Uganda, Lesotho na Namibia.
Intsinzi ya Masengesho yahaye u Rwanda umudari wa Zahabu rugitangira iyi Shampiyona Nyafurika, aho rwitabiriye rufite abakinnyi 29 mu byiciro bitandukanye.
Mu gusiganwa n’ibihe, buri mukinnyi ahaguruka wenyine agahatanira gukoresha igihe gito kurusha abandi, bitandukanye n’isiganwa ryo mu muhanda risanzwe aho abakinnyi bahagurukira rimwe, bagahatana mu kivunge.
Shampiyona Nyafurika y’Amagare ya 2026 ibera i Kisumu, nyuma yo gusiganwa n’ibihe hateganyijwe n’andi masiganwa arimo aya ‘Mixed Relay’ ndetse n’ayo mu muhanda mu byiciro by’abato batarengeje imyaka 17 na 19, abatarengeje imyaka 23 n’abakuru.
Uko irushanwa riteye
Ku wa Gatatu, tariki ya 21 Ukwakira, ni amasiganwa yo gusiganwa n’ibihe buri mukinnyi ku giti cy’umukinnyi, ‘Individual Time Trial’, mu byiciro byose byitabiriye irushanwa.
Abakobwa batarengeje imyaka 19 ni bo babimburiye abandi Saa Mbiri za mu gitondo, ku isaha y’i Nairobi, ubwo hari saa moya ku isaha y’i Kigali, ku ntera ya kilometero 10,2, ari na ho Masengesho Yvonne yegukaniye umudali wa Zahabu.
Abahungu batarengeje imyaka 19 bakurikiyeho basiganwa kilometero 20,4. Harakurikiraho abagore batarengeje imyaka 23 n’abakuru, bose basiganwa ibiilometero 20, abagabo batarengeje imyaka 23 n’abakuru ku ntera y’ibilometero 30,6.
Ku wa Kane, taliki ya 22 Ukwakira, mu gitondo hazaba isiganwa rya Mixed Relay, aho ikipe iba igizwe n’abahungu n’abakobwa, ku ntera y’ibilometero 40,8.
Hazakurikiraho isiganwa ryo mu muhanda ry’abahungu bato, batarengeje imyaka 17, ku ntera y’ibilometero 58,6, abakobwa bakazakora intera y’ibilometero 38,2.
Ku wa Gatanu, taliki ya 23 Ukwakira, abakobwa batarengeje imyaka 19 bazasiganwa mu muhanda ku ntera y’ibilometero 68,8 mu gihe abahungu bo muri icyo kigero bo bazasiganwa intera y’ibilometero 119,8.
Ku wa Gatandatu, taliki ya 24 Ukwakira, hazaba isiganwa ryo mu muhanda ry’abagore n’abatarengeje imyaka 23, rizatangira ku ntera y’ibilometero 122,2.
Shampiyona Nyafurika yo gusiganwa ku magare izasozwa ku Cyumweru, tariki ya 25 Ukwakira, hakinwa isiganwa ry’abagabo n’abatarengeje imyaka 23 ku bilometero 175,2.
