Police Handball Club ikomeje kuyobora urutonde rwa shampiyona

Panorama

Ikipe y’umukino w’intoki ya Polisi y’u Rwanda (Police Handball Club) imaze kubaka izina rikomeye muri uyu mukino mu Rwanda dore ko imaze kwegukana shampiyona inshuro eshanu zose; ikaba ndetse ku wa gatandatu w’icyumweru gishize yaratsinze itababariye  ikipe ya Kaminuza y’u Rwanda  Ishami rya Huye (UR- CASS) ibitego 47 ku 10.

Iyi ntsinzi yahesheje Police HC gukomeza kuyobora urutonde rwa shampiyona muri uyu mukino. Abakinnyi ba Police HC batsinze ibitego byinshi barimo Kabange Emmanuel watsinze ibitego umunani, Jean Baptiste Habimana watsinze bitandatu na Fils Haruna Bizimana watsinze bitandatu.

Umukino wahuje aya makipe yombi wari uwo ku munsi wa gatatu wa Shampiyona. Kuva Shampiyona y’uyu mwaka wa 2018 itangiye, ikipe ya Police HC ntiratsindwa umukino n’umwe.

Mu kiganiro n’Itangazamakuru, Umutoza w’ikipe ya Police HC, Senior Sgt Turatsinze Dismas, yagize ati “Twatwaye ibikombe inshuro nyinshi. Turizera ko dushobora gukomeza gutsinda amakipe tukegukana Shampiyona tudatsinzwe.”

Akomeza agira ati “Intsinzi tuyikesha imyitozo ihagije. Na none tuyikesha ubufasha bw’ibifatika n’inama tugirwa n’Ubuyobozi bukuru bwa Polisi y’u Rwanda”.

Senior Sgt Turatsinze yashimye abakinnyi abereye Umutoza kubera gushyira hamwe baharanira intsinzi, abasaba kudatezuka ku ntego yo gutwara igikombe cy’iyi Shampiyona nk’uko babigenje mu yindi myaka.

Ishyirahamwe Mpuzamahanga ry’uyu mukino riherutse kuvugurura amwe mu mategeko awugenga. Ubu ikipe itsinze umukino ibona amanota 2 bivuye kuri 3. Amakipe iyo anganyije (aguye miswi), zigabana amanita buri imwe igatwara inota rimwe.

Ku munsi wa mbere wa Shampiyona ya 2018, Ikipe ya Police HC yatsinze iya Collège de Gisenyi ibitego 47 kuri 34.

Umukino wakurikiyeho (ku munsi wa kabiri wa Shampiyona ) ikipe ya Polisi yitwaye neza itsinda Collège ADEGI ibitego 42 kuri 34.

Mu myaka ibiri yikurikiranya (2014-2015) Ikipe ya Police Handball Club yegukanye ibikombe muri iyo myaka yombi idatsinzwe umukino n’umwe. Yanatwara ibikombe byose by’Amarushanwa atandukanye ategurwa imbere mu gihugu. Igikombe cy’Amarushanwa y’uyu mwaka yo kwizihiza umunsi wo kwibuka Intwari z’Igihugu gifitwe na Police Handball Club.