Allain Patrick Kanyarwanda
Nk’uko byari byitezwe, mu gitondo cyo kuri uyu wa kabiri, itariki ya 6 Gicurasi 2025, Moses Turahirwa yagejejwe imbere y’urukiko rwa Kicukiro muri Kagarama.
Moses Turahirwa yaburanye ku ifungwa n’ifungurwa ry’agateganyo, mu marira n’agahinda yuzuye ikiniga ku buryo kwiregura byamunaniye abanza kurira. Yemereye urukiko icyaha cyo gukoresha urumogi ariko ngo abiterwa n’agahinda gakabije.
Turahahurira Moses washinze Moshions; inzu ihanga imyambaro yitabye urukiko rw’ibanze rwa Kicukiro aburana ku ifungwa n’ifungurwa ry’agateganyo ku cyaha akurikiranyweho cyo gukoresha ibiyobyabwenge.
Bamuzindiye iya rubika dore ko utahageze mbere ya saa moya atabonye uko yaje. Urebye mu ntanzi z’urukiko hari huzuye abanyamakuru b’imbere mu gihugu n’abakorera ibitangazamakuru mpuzamahanga. Ni cyo kimwe n’abakoresha imiyoboro ya YouTube bari babukereye bashaka inkuru.
Kwinjira mu kibanza cy’urukiko mbere ya saa tatu za mu gitondo byari bibijijwe ndetse hashyizweho abapolisi babwira abantu ko kwinjira mbere ya saa tatu bitemewe. Ni ko byagenze bategereje iyo saha.
Isaha bahawe igeze binjiye ariko nta n’umwe wemerewe kwinjira mu cyumba cy’iburanisha. Habaye gutegereza ko bahabwa uburenganzira bityo buri wese arinjira. Umutekano wari wakajijwe.
Moses Turahirwa yari yambaye inkweto y’umukara, ipantalo y’umukara, ishati itukura n’agapfukamunwa ku buryo ntawapfaga kumubona mu maso.
Yabanje kwicara wenyine, kera kabaye umunyamategeko umwunganira, uvuga gusa icyongereza agasemurirwa n’umukobwa wari wambaye ikanzu ndende ifite amabara y’umweru n’umukara, baramusanga.
Inteko iburanisha yari igizwe n’abacamanza babiri, ku rundi ruhande ubushinjacyaha bwari buhagarariwe na babiri.
Ibihe bikomeye by’urubanza rwa Twahirwa Moses
Saa 9:28, uyoboye Inteko iburanisha yasomye imyirondoro ya Moses Turahirwa. Yahise ahamagara Moses Turahirwa n’umwunganira begera imbere. Umwunganira ntabwo azi ikinyarwanda, yari yitwaje umusemuzi witwa Batete Françoise.
Kugeza ubwo Moses Turahirwa n’umwunganira bahamagarwaga nta muntu n’umwe wari uzi ko yiyambaje umunyamategeko utavuga ikinyarwanda.
Moses Turahirwa yabonye izuba ku itariki 13 Werurwe 1991 avukira i Nyamasheke mu ntara y’i Burengerazuba. Umwirondoro umaze gusomwa yemeye ko ari we.
Arashinjwa gufatanwa urumogi no kurunywa. Yafatanywe udupfunyika 13. Moses Turahirwa yemeye icyaha cyo gukoresha urumogi, icyakora ahakana ko atafatanywe urumogi rungana n’udupfunyika 13. Yasobanuye ko yatanze amagarama 2 y’urumogi rwa Hybrid.
Saa 9:36 Ubushinjacyaha bwahawe umwanya
Umushinjacyaha yasobanuye ko umwunganizi wa Moses Turahirwa yabanza akagira ibyo asobanura. Habayeho imbogamizi y’ugomba gusemura ibyo avugwa n’uwunganira Turahirwa Moses wari atarahagera.
Inyito y’icyaha yahindutse
Umushinjacyaha yakosoye inyito yari yakoreshejwe ku cyaha akurikiranyweho uregwa, asobanura ko ashinjwa gutunda, kubika no gufatanwa ibiyobyabwenge cyo mu bwoko bw’urumogi.
Ubugenzacyaha bwasatse urugo rwa Moses Turahirwa bamusangana udupfunyika 13 tw’urumogi. Yasanzwemo igipimo cya 146mg nyamara umuntu muzima ntagomba kurenza 0.20mg.
Gutunda urumogi
Mu iperereza ryakozwe basanze ashobora kuba akura urumogi muri Kenya ku buryo yaba arucuruza. Ubushinjacyaha bwagaragarije urukiko ko akwiriye gufungwa iminsi 30 y’agateganyo, kuko hari impamvu zikomeye zituma asabirwa gufungwa. Moses Turahirwa yemereye ubugenzacyaha ko akura urumogi muri Kenya akaba arunywa.
Hiyongereyeho ibisobanuro bishimangira ko hari inyandikomvugo irimo ko mu isaka hafashwe udupfunyika 13 ndetse n’abatangabuhamya basinye kuri izo nyandiko.
Hari kopi y’urubanza rwaburanishirijwe i Nyarugenge ku cyaha cyo gukoresha urumogi akatirwa imyaka itatu n’amezi atandatu n’ubwo ategereje kuzajurira.
Ubushinjacyaha bufite impungenge ko adafunzwe yabangamira iperereza kandi ko ashobora kuba acuruza urumogi.
Saa 9:54 Moses Turahirwa yaturitse ararira
Moses Turahirwa umwanya we ugezweho ngo yiregure yarize arahogora. Byabaye ngombwa ko umucamanza afata inshingano za kibyeyi aramuhoza. Ati “Nta n’amazi mwamuzaniye? Nta muntu wo mu muryango we waje kumva urubanza rwe? Moses humura mbwira ndahari!”
Abari mu cyumba cy’iburana bagize agahinda ko kubona Moses Turahirwa aririra mu rukiko. Yashize amanga araburana asobanura ko yabyukijwe mu gicuku, urugi ruricwa arahuruza. Yavuze ko yabanje gukeka ko ari abagizi ba nabi baje kumugirira nabi nk’uko byari byarabaye hambere.
Agira ati “Nanywaga Cannabis iva muri Kenya. Yari amagarama abiri kandi nayashyikirije umupolisi. Impamvu nkoresha urumogi ni uburwayi no kugerageza kwifasha mu gahinda gakabije. Mu bashakashatsi nakoze, nasanze imiti myinshi hakoreshwa Cannabis”. Yakomeje atakambira urukiko asobanura ko ari gushaka uko yareka burundu urumogi.
Ku cyaha cyo gutunda urumogi yasobanuye ko atari ugutunda ahubwo mu ngendo akora ashaka ubwoko bwa Cannabis bwamuvura, yerekeje muri Kenya agura urwo rumogi kuko mu Rwanda nta rumogi rwamuvura ruhari.
Umucamanza yabajije niba hari itandukaniro ku rumogi rwa Kenya n’urwo mu Rwanda, undi asubiza atazuyaje ko n’iyo warwitegereza ubona itandukaniro.
Icyaha cyo kubika urumogi
Moses Turahirwa yasobanuye ko ubwo yafatwaga atari ameze neza kandi ko yabonanye n’abaganga ku buryo nta rumogi abika. Raporo y’isaka ntabwo ayemera kuko atabonye asakwa.
Asobanuye ko iyo nyandiko n’abatangabuhamya ntabyo azi nubwo yayisinyeho. We yemera ko yatanze ku bushake urumogi yari asigaranye. Mu ijoro yafatiwemo hafashwe ifoto yerekana urumogi yari afite, ku buryo ibyabaye nyuma atabizi.
Moses Turahirwa yasabye imbabazi urukiko anahishura ko ari kwitabwaho n’abaganga mu nzira zo kureka urumogi. Yanyuzagamo amarira akaba menshi. Yasabye imbabazi Imana, Igihugu, inshuti n’umuryango.
Yijeje urukiko ko asubikiwe igihano yajya atanga ibipimo byerekana igipimo cy’urumogi mu maraso. Yanavuze ko ari mu nzira zo kurureka burundu.
Yari afite gahunda yo kujya kwivuriza muri Amerika ibijyanye no gukoresha urumogi. Umuganga wo mu Kigo cy’Igihugu cy’Ubuzima –RBC, yaramupimye afata ibipimo byazifashishwa mu gihe byaba bikenewe.
Turahirwa Moses yemeye bimwe mu byaha aregwa, ariko bitewe n’ikibazo cy’ururimi byagaragaye ko umwunganizi we yahakanaga n’ibyo umukiriya we yiyemerera.
Dosiye ye yaregewe Urukiko ku wa 28 Mata 2025, ikirego cyandikwa ku wa 30 Mata 2025.
Urubanza ruzasomwa ku wa 09 Gicurasi 2025 ku isaha ya saa munani, nk’uko byatangajwe n’Urukiko rw’Ibanze rwa Kicukiro.
