Ronald Koeman umutoza w’Ikipe ya Barcelona ukomoka mu buholandi yirukanwe na Barcelona nyuma y’amezi 14 ashinzwe kuyobora ikipe, akaba yamenyeshejwe ko yirukanywe nyuma y’umukino wahuje Barcelona na Rayo Vallecano, warangiye Barcelona itsinzwe 1-0.
Nk’uko tubikesha Ikinyamakuru Sky Sports, Koeman ubwo yavugaga mbere yuko yirukanwa nk’umutoza mukuru wa Barcelona, yavuze ko ‘bidasanzwe’ iyi kipe yatsinzwe na Rayo Vallecano ariko yemera ko iyi kipe ya FC Barcelona yataye umurongo.
Mu magambo magufi yashyizwe ahagaragara kurubuga rwiyi kipe yemeza ko perezida Joan Laporta yakuyeho umuholandi ku mirimo ye yo gutoza ikipe.
Ikipe ivuga ko Ronald Koeman ku wa Kane yasezera abakinnyi ku kibuga Ciutat Esportiva., FC Barcelona yamushimiye ibyiza yakoreye iyi kipe, kandi imwifuriza amahirwe masa n’ibyiza byose mu mwuga we.
Mu Cyumweru gishize yari yatsinzwe na Real Madrid 2-1 ku kibuga Camp Nou. Iyi kipe ya Barcelona FC yari ikomeye mu myaka ishize ubu imerewe nabi no gutsindwa umusubirizo nyuma y’uko Lionel Messi ayivuyemo akajya muri Paris St Germain ndetse n’abandi bakinnyi bakomeye barimo: Louis Suarez na Antoine Griezmann bombi bagiye muri Atletico Madrid.
Tariki 19 Kanama, 2020 nibwo Koeman yagizwe umutoza wa Barcelona, asinya amasezerano y’imyaka ibiri yari kugeza tariki 30 Kamena, 2022.
Asize FC Barcelona ku mwanya wa 9 n’amanota 15 mu gihe Real Madrid zihora zihanganye ari iya mbere n’amanota 21.
Ibyimanikora Yves Christian
