Minisitiri w’Umutekano Imbere mu Gihugu, Dr. Vincent Biruta yatangaje ko ubufatanye bw’ibihugu bigize umuryango uhuza Polisi zo mu Karere u Rwanda ruherereyemo, Eastern Africa Police Chiefs Cooperation Organization (EAPCCO) n’Ubushinwa bwatanze umusaruro mu guhangana n’ibyaha by’ikoranabuhanga.
Uyu muyobozi ubifatanya no kuyobora iri huriro yabivugiye mu nama y’abayobozi bakuru ba Polisi b’ibihugu biri muri uyu muryango yabahuje n’abari bahagarariye Ubushinwa ku rwego rw’Abaminisitiri, yateraniye mu Rwanda kuri uyu 05, Ukwakira, 2025.
Ibaye ku nshuro ya kabiri, ikiga yiga ku mikoranire mu by’umutekano no kubahiriza amategeko mu bihugu bigize uyu muryango.
Minisitiri Biruta yashimye uko Ubushinwa bufatanya n’ibihugu bihuriye muri uyu muryango, avuga ko iyo nama izerekana uko umusaruro w’imikoranire n’ubufatanye ku mpande zombi uhagaze.
Ati: “Twishimiye kubakira mwese mu Rwanda muri iyi nama. Dufite ishema ryo kwakira inama ikomeye igamije gukomeza ubufatanye mu kurinda umutekano mu bihugu byacu”.
Biruta avuga ko kwitabira kw’abayobozi baturutse mu bihugu bitandukanye ari ikimenyetso cy’uko Ubushinwa bukorana neza nabo mu guhangana n’ibibazo by’umutekano birimo ibyaha by’ikoranabuhanga, ibyaha biteguwe neza n’ibindi byiyongera buri munsi bikagira ingaruka ku Bushinwa no ku bihugu bigize aka karere ka EAPCCO.
Ati “Ndashaka kandi gushimira ibihugu byose bigize EAPCCO n’u Bushinwa kubera ubwitange n’ubufatanye mugira mu kubaka ubufatanye mu rwego rw’ubutabera no kurwanya ibyaha, haba mu rwego rw’akarere no ku rwego mpuzamahanga.”
Umunyamabanga wa Leta Wungirije Ushinzwe Umutekano w’u Bushinwa Xu Datong yavuze ko iyi nama ari amahirwe yo kongera gushimangira ubushake n’ubwitange ibihugu byombi bifite mu gushyira mu bikorwa ibikubiye mu Masezerano y’Ubwumvikane (MoU).
Iyi nama yabanjirijwe no gusinya amasezerano hagati y’u Rwanda n’u Bushinwa y’ubufatanye hagati ya Polisi mu kurushaho gushimangira umubano ibihugu byombi bisanganywe.
Yashyizweho umukono na Minisitiri Biruta n’uwari uhagarariye Ubushinwa, Xu Datong.
Akubiyemo gukumira no kurwanya iterabwoba n’ibyaha bikorerwa ku rwego mpuzamahanga, kuzamura urwego mpuzamahanga rw’amabwiriza ya Polisi no guteza imbere ubunyamwuga mu nzego zishinzwe umutekano n’amategeko.
Hagati aho impande zirebwa n’ayo masezerano ziyemeje gukomeza gukorana no mu butasi, iperereza rigamije guhashya ibyaha byambukiranya imipaka n’iterabwoba, guhererekanya abanyabyaha, gusangira ubumenyi, kuranya ibitero by’ikoranabuhanga, gutoza polisi yo mu Karere, gufashanya mu kubona ibikoresho bigezweho no kubaka umubano ushingiye ku bwubahane.
Biteganyijwe ko guhera muri uyu mwaka(2025) Ubushinwa buzajya butanga inkunga y’ibikoresho bya Polisi bifite agaciro ka $137,000 (arenga miliyoni Frw 176)kuri buri gihugu kizaba kiyoboye EAPCCO.
U Bushinwa buzohereza amatsinda y’abapolisi babwo mu bihugu bya EAC babifashe gukemura ibibazo bijyanye no kubahiriza amategeko kandi mu mwaka wa 2026 buzatanga amahugurwa ku bantu 400 bo muri EAPCCO.
Iki gihugu kandi cyavuze ko kizashyigikira uwo EAPCCO izatangaho umukandida ngo ayobore Polisi mpuzamahanga bita Interpol.
