Jackson Kwizera
Abafatanyabikorwa bagira uruhare mu guteza imbere urwego rw’ubuzima bakomeje gutanga ibikoresho bitandukanye byifashishwa mu buvuzi. Muri bo harimo gahunda ya IMPALA ibinyujije muri gahunda yayo izwi nka Goal 3, imaze gusakaza ibikoresho by’ikoranabuhanga bifasha mu kwita ku bana barembye ndetse n’abavutse batagejeje igihe.
IMPALA ni uburyo bukoresha ikoranabuhanga mu gukurikirana ibibazo bishobora kuvuka ku mpinja zavutse zitagejeje igihe, abana bato n’ababyeyi. Iri koranabuhanga rifasha abaganga kumenya vuba ikibazo cy’umwana no gufata ingamba.
IMPALA bisobanura Innovative Monitoring-system for Pediatrics in Low-resource settings: an Aid to save lives, bisobanuye mu Kinyarwanda nk’“uburyo bugezweho bwo gukurikirana ubuzima bw’abana mu mavuriro afite ubushobozi buke hagamijwe kurokora ubuzima.”
Uruhare rwa Goal 3 mu kurengera ubuzima bw’abana rugaragazwa n’ababyeyi babyara abana batagejeje igihe ndetse n’abaganga bakoresha iri koranabuhanga mu kubitaho.
Uwamahoro Patricie, umubyeyi w’abana babiri, avuze ko yageze ku Bitaro bya Nyamata inda ifite amezi atandatu, afite ububabare bukomeye. Agezeyo abaganga bamubwiye ko agomba kubyara vuba kugira ngo bakize ubuzima bw’umwana, ibintu byamuteye ubwoba.
Ati:“Bambwiye ko umura wifunguye kandi ngomba kubyara. Naratinye cyane kuko numvaga umwana w’amezi atandatu atazabaho. Ariko abaganga baranyitayeho cyane, ubu umwana wanjye arimo kwiyongera ibiro, bivuze ko vuba tuzataha.”
Uyu mubyeyi ashimira Leta y’u Rwanda n’abafatanyabikorwa bayifasha kuzana ikoranabuhanga rifasha abaganga kwita ku bana bavutse bafite ibibazo bitandukanye.
Iyo umubyeyi abyaye umwana utagejeje igihe cy’amezi icyenda, bitewe n’impamvu zitandukanye, akenshi bamwe batakaza icyizere cyo kubona uwo mwana abaho.
Mujawamariya Laetitia, ushinzwe serivisi za Néonatologie (ivura impinja kuva zivutse kugeza ku minsi 28) na Pediatrics (ivura abana barengeje iminsi 28), avuga ko Goal 3 ari igisubizo gikomeye mu kuvura abana.
Ati:“Goal 3 ni umufatanyabikorwa mwiza wadufashije cyane. Ubusanzwe abaganga ni bake, by’umwihariko mu ishami ryita ku mpinja. Monitor na tablets baduhaye bidufasha kumenya vuba umwana ufite ikibazo n’iyo umuforomo ari mu bindi. Bituma tugera ku mwana vuba, bityo bigafasha kugabanya impfu z’abana.”
Umwe mu baganga ufite uburambe bw’imyaka irenga 20 mu buvuzi nawe agaragaza akamaro k’izo mashini mu gutabara ubuzima bw’impinja.
Ati:“Ku munsi twakira abana bari hagati ya 35 na 55, ariko abakozi bakora muri serivisi ni bane gusa. Uruhinja ruri muri Néonatologie rukeneye byinshi birimo kugaburirwa, guhabwa umwuka, gusuzumwa umutima n’ibihaha. Izi mashini zituma tumenya vuba umwana wagize ikibazo, ku buryo tugera aho ari vuba mbere y’uko ubuzima bwe bwangirika.”
Abaganga bo mu Bitaro bya Nyamata bavuga ko iri koranabuhanga rizafasha kugabanya impfu z’abana no kwihutisha ubuvuzi bahabwa.
Dr Cyrille Ntahompagaze, ushinzwe ubuvuzi mu Bitaro bya Nyamata, ashimira abafatanyabikorwa ba Goal 3 kubera uruhare rwabo mu gufasha ababyeyi no gukiza ubuzima bw’impinja.
Ati:“Mu kwezi kwakiraga ababyeyi barenga 700 babyarira hano. Muri bo harimo ababyara abana batagejeje igihe cyangwa bafite ibibazo bitandukanye. Mbere, mu kwezi twapfushaga abana hagati ya 14 na 16, ariko kuva twabona ibikoresho bya Goal 3, imibare yaratangiye kugabanuka kuko ubu abapfa bari hagati ya 6 na 11.”
Umushinga IMPALA ukorera mu bitaro bitandukanye birimo Nyamata, Rwamagana, Kabutare, CHUK na Kirehe.
Binyuze muri gahunda ya Goal 3, IMPALA imaze gutanga imashini zirenga 100 zikoreshwa mu mashami ya Néonatologie, Pediatrics n’aho babyariza, ku bufatanye na Minisiteri y’Ubuzima.
Izi mashini zifite ubushobozi bwo gukora amasaha 24 kuri 24 kandi zikabika umuriro ushobora gukora amasaha agera ku 10 mu gihe amashanyarazi yaba yagiye, bigafasha gukomeza gukurikirana ubuzima bw’impinja nta nkomyi.
