Umuyobozi wungirije ushinzwe ibijyanye n’ububanyi n’amahanga muri Minisiteri y’Ububanyi n’Amahanga ya Leta Zunze Ubumwe za Amerika ushinzwe ibya Afurika, Sarah Troutman, hamwe n’abayobozi b’iyo minisiteri, bakiriye abahagarariye amasosiyete Lifezone Metals na KoBold Metals, ndetse n’abayobozi bo mu Burundi, mu muhango wabereye muri U.S. Department of State.
Wari uwo gushyira umukono ku masezerano agamije guteza imbere ubufatanye mu bucuruzi hagati ya Leta Zunze Ubumwe za Amerika n’u Burundi, cyane cyane mu rwego rwo guteza imbere ubucukuzi n’ubucuruzi bw’amabuye y’agaciro y’ingenzi ku isi (critical minerals).
Ayo masezerano agamije gufasha impande zombi kubaka ubufatanye bufitiye inyungu ibihugu byombi, cyane cyane mu gushimangira uburyo bwo kubona amabuye y’agaciro akenerwa mu nganda z’ikoranabuhanga, ingufu zisubira (nk’imodoka zikoresha amashanyarazi) n’ibindi bikoresho by’ikoranabuhanga rigezweho.
Abayobozi ba Amerika bashimye icyerekezo cya Leta y’u Burundi cyo guteza imbere ubukungu bushingiye ku mutungo kamere, ndetse banashimira uruhare rw’abikorera ku giti cyabo mu gushora imari igamije guteza imbere ubukungu bw’Akarere no guteza imbere imibereho myiza y’abaturage.
U Burundi ni kimwe mu bihugu byo mu Karere ka Afurika y’Iburasirazuba bifite amabuye y’agaciro y’ingenzi arimo Nickel, Coltan, Cobalt na Lithium, akenerwa cyane mu gukora bateri z’imodoka zikoresha amashanyarazi ndetse n’ibikoresho by’ikoranabuhanga nka telefoni na mudasobwa.
Amasosiyete nka Lifezone Metals na KoBold Metals azwiho gukora ubushakashatsi ku mabuye y’agaciro hifashishijwe ikoranabuhanga rigezweho, harimo n’ubwenge bw’ubukorano (Artificial Intelligence), hagamijwe kumenya aho ayo mabuye aherereye no kuyacukura neza.
Ubu bufatanye buri mu murongo wa politiki ya Amerika yo gushaka guhangana n’Ubushinwa mu kugenzura no kubona amabuye y’agaciro y’ingenzi ku isi, cyane cyane muri Afurika ifite umutungo kamere ukenewe cyane mu nganda z’iki gihe.
Nanone, ubu bufatanye bushobora gufasha u Burundi kongera ishoramari riva mu mahanga, kongera imirimo no guteza imbere ubukungu bwabwo butifashe neza.
