Mu Mujyi wa Kigali hatangijwe inama y’iminsi itanu ihuje impuguke zo mu bihugu bigize Umutwe w’Ingabo za Afurika y’Iburasirazuba ziteguye gutabara mu bihe bikomeye (EASF), hagamijwe kunoza no guhuza inyandiko zigenga ibikorwa by’ingabo zirwanira mu kirere.
Iyi nama yatangiye ku wa 15 Kamena ikazageza ku wa 19 Kamena 2026, ikaba yibanda ku gusuzuma no kwemeza inyandiko z’ingenzi zirimo amabwiriza ngenderwaho y’ibikorwa bihuriweho by’ingabo zo mu kirere, uburyo bwo kubishyira mu bikorwa ndetse n’amasezerano y’ubufatanye ajyanye n’ubutabazi mu gihe cy’ibiza cyangwa ibindi bihe byihariye.
Uyu muhango wo gutangiza inama wayobowe n’Umuyobozi w’Ishuri ry’Ingabo z’u Rwanda zirwanira mu Kirere, Brig Gen Louis Kanobayire, wari uhagarariye Umugaba Mukuru w’Ingabo z’u Rwanda, Gen Mubarakh Muganga.
Abitabiriye iyi nama baturutse mu bihugu bitandukanye bigize EASF birimo u Rwanda, Uganda, Kenya na Ethiopia, aho bari kuganira ku buryo bwo kurushaho kongera ubushobozi bw’ingabo zo mu kirere no guteza imbere ubufatanye mu bikorwa byo gutabara abaturage mu gihe cy’ibibazo cyangwa ibiza.
Mu ijambo rye, Brig Gen Kanobayire yagaragaje ko uru rubuga rw’ibiganiro ari amahirwe akomeye yo gukomeza gushimangira ubufatanye hagati y’ibihugu by’akarere, cyane cyane mu rwego rwo kwitegura guhangana n’ibibazo bishobora guhungabanya umutekano cyangwa imibereho y’abaturage.
Yavuze ko gushyiraho amabwiriza n’imikorere ihuriweho bizafasha ibihugu bigize uyu muryango kurushaho gukorana neza mu bikorwa byo gutabara no kubungabunga amahoro.
EASF ni umwe mu mitwe y’akarere igize Ingabo za Afurika zihora ziteguye gutabara, ufite inshingano zo gutegura no guhuza ibikorwa byo gushyigikira amahoro n’umutekano mu Karere ka Afurika y’Iburasirazuba.
Mu gihe cy’imyaka itatu iri imbere, uyu mutwe uzaba uyobowe na Brig Gen Ronald Rwivanga, watangiye inshingano ze muri Gicurasi 2026 nyuma yo kugirirwa icyizere cyo kuyobora EASF mu mpera z’umwaka ushize.
Brig Gen Rwivanga akorera ku cyicaro gikuru cya EASF giherereye i Nairobi muri Kenya, aho azakurikirana ishyirwa mu bikorwa rya gahunda zitandukanye zigamije guteza imbere ubushobozi bw’uyu mutwe mu rwego rwo kubungabunga amahoro n’umutekano mu karere.
