Ikipe y’Igihugu y’u Rwanda Amavubi yatsinze Cap-Vert ibitego 2-1 mu mukino w’Umunsi wa Kabiri wo mu Itsinda K ryo gushaka itike y’Igikombe cya Afurika cya 2027, mu mukino wabereye kuri Estádio Nacional de Cabo Verde i Praia.
Cap-Vert ni yo yafunguye amazamu ku munota wa 40, ubwo Gilson Tavares yatsindiraga ikipe ye, ariko Amavubi ntiyatinze gusubiza. Ku munota wa 45+2, Niyomugabo Claude yarekuye ishoti rikomeye ari hanze y’urubuga rw’amahina, umupira ujya mu nshundura, Amavubi ajya kuruhuka anganya 1-1.
Mu gice cya kabiri, u Rwanda rwakomeje gukina rushaka igitego cy’intsinzi, maze ku munota wa 51 Iradukunda Elie Tatou atsindira Amavubi igitego cya kabiri ku mupira wari uhinduwe na Joy-Lance Mickels. Iki gitego cyahaye u Rwanda ubuyobozi bw’umukino, rwakomeje kurinda umusaruro kugeza ku musifuzi asoje umukino.
Iyi ntsinzi ikomeje intangiriro nziza y’Amavubi mu gushaka itike ya CAN 2027. Mu mukino wa mbere w’iri tsinda, u Rwanda rwari rwatangiye rutsinda Liberia ibitego 3-1, mu gihe Cap-Vert yari yatakaje umukino wa mbere itsindwa na Mali ibitego 3-1.
U Rwanda na Cap-Vert zari zisanzwe zifite amateka yo guhura mu gushaka itike ya CAN, aho mu mikino ibiri yo gushaka itike ya CAN 2021 zombi zanganyije 0-0. Cap-Vert kandi yari iherutse kwitabira Igikombe cy’Isi cya 2026, mu gihe u Rwanda rwo rutarongera kugera ku mukino wa nyuma wa CAN kuva rwitabira irushanwa inshuro imwe rukumbi muri 2004.
FT: Cap-Vert 1-2 Rwanda 🇨🇻🇷🇼
Ibitego:
⚽ 40′ Gilson Tavares — Cap-Vert
⚽ 45+2′ Niyomugabo Claude — Rwanda
⚽ 51′ Iradukunda Elie Tatou — Rwanda
Kugeza ubu u Rwanda rufite amanota 6 mu mikino 2, mu gihe Mali ifite amanota 3 mbere yo gukina na Liberia kuri uyu wa Kabiri. Umukino wa Liberia na Mali ukaba uteganyijwe gukinwa ku isaha ya 21:00.
