Ihuriro Front pour la Refondation de la Nation (FRN), risimbuye Alliance Fleuve Congo (AFC), ryatangaje ko rizakomeza kubahiriza ibyo AFC yari yariyemeje, birimo n’amasezerano yavuye mu biganiro by’amahoro bya Doha byahuzaga AFC/M23 na Guverinoma ya Repubulika Iharanira Demokarasi ya Congo (RDC).
Ibi byatangajwe mu itangazo FRN yashyize ahagaragara ku wa 14 Ukwakira 2026, i Goma, rivuga ko iri huriro ryashinzwe ku wa 12 Ukwakira 2026, risimbura AFC mu buryo bwemewe.
Iri tangazo ryashyizweho umukono na Prof. Freddy R. Kaniki, Umunyamabanga Mukuru akaba n’Umuhuzabikorwa w’Urwego Nshingwabikorwa rwa FRN, ryamenyesheje abaturage ba Congo n’amahanga ko ishyirwaho ry’iri huriro rishya ryasojwe no gusesa AFC.
FRN ivuga ko izakomeza gukora imirimo yose yari ishinzwe na AFC, ikanasigarana inshingano n’amasezerano iryo huriro ryari ryaragiranye n’izindi mpande. Muri ibyo harimo ibyemeranyijweho mu biganiro by’amahoro byabereye i Doha, bigamije gushaka igisubizo ku ntambara n’ibibazo by’umutekano bimaze igihe muri RDC.
Ibi bigaragaza ko ihinduka rya AFC rikaba FRN ritavuze ko ibyo yari yiyemeje mu biganiro by’amahoro bihagarara, kuko iri huriro rishya ryemeje ko rizakomeza kubyubahiriza.
Icyakora, itangazo rya FRN ntirisobanura neza niba hazabaho impinduka mu buryo ibiganiro na Leta ya Congo bizakorwa, abazarihagararira cyangwa niba hari izindi ngingo zizongerwa ku byari byemeranyijweho.
**Joseph Kabila ayoboye ihuriro rishya**
FRN yashinzwe nyuma y’itangazwa ry’iseswa rya AFC, ihuriro ryari rifitanye isano n’umutwe wa M23 ukomeje kugira uruhare mu ntambara zo mu burasirazuba bwa RDC.
Mu mavugurura yakozwe mu buyobozi bw’iri huriro, Joseph Kabila wahoze ari Perezida wa RDC yagizwe umuyobozi waryo. Mu bamwungirije harimo Corneille Nangaa, wahoze ari umuhuzabikorwa wa AFC/M23.
Maj. Gen. Sultani Makenga na we ari mu bayobozi bungirije Kabila, akaba azakomeza no kuyobora igisirikare cya ARC-M23, gikorera muri iri huriro.
FRN ivuga ko intego yayo ari ugushaka ibisubizo ku bibazo byugarije Congo, ikaba itarakuyeho uburyo bwo gukoresha imbaraga za gisirikare mu kugera ku byo yiyemeje.
Nubwo iri huriro ryatangaje ko rizakomeza kubahiriza ibyo AFC yari yiyemeje mu biganiro bya Doha, uko ibyo bizashyirwa mu bikorwa n’ingaruka bizagira ku nzira y’amahoro hagati yaryo na Leta ya RDC biracyategerejwe.
