Connect with us

Hi, what are you looking for?

Amakuru

Abahinzi baragerekwaho igihombo RAB na HORECO bagombye kubazwa

Abahinzi basanze nta musaruro w'ibigori bazabona kubera ko basanze imbuto z'ibigori zarajeho ari urutarutaru (Ifoto/ Rene Anthere)

Ni mu gishanga cya Rugende kiri hagati y’umurenge wa Nyakariro muri Rwamagana n’uwa Masaka muri Kicukiro. Ni ubuso bungana na Hegitari 45 zihinzeho ibigori. Urebye ubwiza bwabyo bihagaze wakwibaza ko bigiye gutanga umusaruro ushimishije. Si ibyo ubona, iyo utomboje ikigori ukagihambura kuko intete zajeho ari urutarutaru, ari ibihanga. Ibigori birumbye byari byitezweho umusaruro ugera kuri Toni 200.

Iki gihombo Ikigo cy’Igihugu gishinzwe ubuhinzi n’ubworozi -RAB, kikigereka ku bahinzi. N’ubwo bimeze bityo, abahinzi bibumbiye muri Koperative COMSS itubura imbuto igereka amakosa kuri RAB mu gihe bashyize mu bikorwa ibyo basabwe babifashijwemo n’abagoronome b’inzobere ba HORECO.

Iyo wegereye abo bahinzi, usanganirwa n’amarira akomoka ku gihombo kigiye kubagwaho nyamara bari bizeye umusaruro uashimsihije. Ntibumva ukuntu RAB yabahaye imbuto, bakaba bafite inzobere mu buhinzi zibafasha mu gutubura imbuto, ariko ibigori bikaba bigeze igihe cyo kwera nta birimo.

Abahinzi basanze ibigori byabo nta musaruro bizabaha (Ifoto/Panorama)

Mporanyisenga Jeannette ni umwe mu bahinzi bakorera muri Koperative COMSS. Avuga ko bakurikije amabwiriza bahawe n’abagoronome, baterera igihe, kandi bafumbira uko bigombye, ariko bagiye kureba uko ibigori bihetse bimeze barumirwa.

Agira ati “Igihe ibigori bitangiye guhumbya umusatsi wa mbere, twaratabuye ngo turebe uko bimeze; twasanze ari ibihanga nta bigori bizaho. Ibigori twabibanguriye uko bikwiriye, twibajije impamvu iratuyobera. RAB twayibwiye ikibazo twagize, baradusura barabyibonera. Ikibabaje batubwiye ko twateye nabi. Ahubwo twasanze bishoboka ko ari imbuto mbi bashobora kuba baraduhaye. Twifuza ko RAB itatugerekaho igihombo, kuko ibyo dusabwa twarabyubahirije.”

Ntakirutimana Innocent na we ni umutubuzi w’imbuto muri COMSS. Ntanyuranya na bagenzi be ariko agira ati “Abayobozi bacu babonanye n’abayobozi ba RAB babasobanurira ikibazo uko kimeze ariko nta gisubizo baraduha. Igihe cyo gutera kigeze baduhaye imbuto, abagorome ba Koperative n’aba HORECO batujyanye ku karimashuri batwereka uko tugomba gutera ibigori. Twarabyubahirije rero. Imbuto twayiteye nk’uko ubushize twari twayiteye kandi dukurikiza uburyo bwo gufumbira.”

Abahinzi bakomeza bavuga ko bigiye kubatera ubukene kuko n’umusaruro wa mbere warumbye, bakaba bafite impungenge z’igihombo kigiye kongera kubageraho.

Umusaruro w’ibigori nk’ibi RAB ntiyemera kuwugura kuko haba hakenewe ibizavamo imbuto nziza (Ifoto/Panorama)

Umuyobozi wa Koperative COMSS, Kayitesi Francine, na we agusha mu ry’abahinzi kuko umusaruro bari biteze utazagerwaho. Avuga kandi ko igihombo badakwiye kucyirengera bonyine, kuko amakosa yatangiye ubwo, Uzayisenga Christine, umukozi wa RAB yabazaniraga imbuto. Ku mbuto yabazaniye yababwiye ko ubusanzwe kuri Hegitari haterwagaho ibiro 15 ariko kuko imbuto yaje ari ntoya bagomba guteraho ibiro 12 gusa. Ubwo ngo imbuto yayihaye abagoronome arigendera, bikagerekaho ko imbuto bayihawe bakererewe ku itariki 20/10/2020 abandi baratangiye kubagara.

Agira ati “Twe tubona igihombo kiri mu mbuto baduhaye kuko itari isanzwe. Baduhaye imbuto idafite amabwiriza ariko baza batubwira ko tutayubahirije. Ibyo twasabwe gukora byose twarabikoze, dufashijwe n’abagoronome basanzwe badufasha. Na ho ubundi ibyo batubaza ntabyo batubwiye mu gihe batuzaniraga imbuto. Twakurikije amabwiriza yari asanzwe.”

Kayitesi akomeza avuga ko ari igihombo ku bahinzi no kuri Koperative ariko batagombye kucyiharira kuko nta makosa bakoze, bakurikije uko bari basanzwe batera imbuto. Avuga ko bari biteze kuzasarura nibura Toni 200 zifite agaciro ka miliyoni 190 z’amafaranga y’u Rwanda.

RAB na HORECO hari ibyo bahuriraho

HORECO ni ikigo gifite abatekinisiye bakurikirana abatubuzi b’imbuto kibaha ubufasha mu bijyanye n’ubuhinzi. Bavuga ko ikibazo cyatewe n’uko RAB yatanze imbuto ariko ntitange amabwiriza ajyanye na yo kandi yari nshya.

Iyo wegereye umurima w’ibigori ubona ko bisa neza bishobora kuba bifite umusaruro. Ukuri kwabyo kubonaka ubihambuye (Ifoto/Panorama)

Ndayizeye Emmanuel Umuyobozi wa HORECO, agira ati “Imbuto yaje ni nshya kandi ikintu gishya cyose kiba gifite protocol yacyo. Kuba haraje imbuto nshyashya, hagombye kuba haratanzwe amabwiriza ku bahinzi ajyanye na yo ntihakurikizwe ayo basanzwe bakoresha ku mbuto basanganwe.”

Ku kireba n’uko nk’abantu bazobereye mu buhinzi impamvu bemeye ko abahinzi bakurikirana batera imbuto idafite amabwiriza, kandi bahawe imbuto nshyashya, Ndayizeye avuga ko hashobora kuba harabaye uburangare bakihutira gutera. Ariko kandi HORECO yemera uburangare nk’uko Ikigo cy’Igihugu gishinzwe ubuhinzi n’ubworozi -RAB kibyemeza.

Umuyobozi Mukuru wa RAB, Dr Karangwa Patrick, avuga ko kugira ngo ibigori byere ari ibihanga byatewe n’amabwiriza atarubahirijwe, ayo akaba ari amakosa yakozwe kuko ubundi bagombaga kubanza gutera imbuto z’ibigabo, nyuma y’iminsi ine bakabona gutera iz’ibigore. Bagombaga kandi gutera umurongo umwe w’ibigabo, hanyuma bagakurikizaho itatu y’ibigore ariko ngo hamwe siko babyubahirije.

N’ubwo Karangwa avuga atyo agera aho yemera ko hari amakosa yakozwe bafitemo uruhare. Agira ati “abahinzi bakoze amakosa yo gutera imbuto nabi kuko hari aho twasanze barateye imirongo irenga ine y’ibigore nyamara atari ko amabwiriza ameze. Bateye imbuto nabi rero. Ariko kandi umutekenisiye wacu na we yakoze amakosa kuko atafashe umwanya wo kubasobanurira bihagije. Hari amakuru kuri Hybrid umutekinisiye atari afite. Ntibagire impungenge ibijyanye n’igihombo tuzabisuzuma umusaruro wabonetse.”

Dr Karangwa Patrick avuga ko iby’igihombo bazabisuzuma ariko uko umusaruro wabonetse, ariko ubwo yasuraga abahinzi bo muri Koperative COMSS arikumwe na Guverineri w’Intara y’Iburasirazuba, yavuze ko abahinzi baziharira igihombo. Iyi mvugo yaciye intege abahinzi. Abahinzi bavuga ko bo ntacyo bari bakwiye kubazwa mu gihe bafite abagoronome babyize banabakurikirana, ahubwo RAB yakoze amakosa ariyo ikwiye kongera kwirengera igihombo.

Ubusanzwe mu butubuzi bw’imbuto y’ibigori, kugira ngo ibangurira rizagende neza, habanza guterwa imirongo y’ibigabo, nyuma y’iminsi nibura ine hagakurikiraho ibigore. Ibigabo biterwa ku murongo umwe hagakurikiraho imirongo itatu y’ibigore, bityo bityo. Ntibemerera ibigore ko bisambura, bahita babikona bikabangurirwa n’ibigabo. Ibigabo biterwa mbere kugira ngo ibigore bizakure bisanga ibigabo byarageze igihe cyo kubangurira.

Rwanyange Rene Anthere

2 Comments

2 Comments

  1. Christine Mukeshimana

    March 22, 2021 at 18:33

    hhhhhhhhhhhhhhhhh hariya nyine ikosa niryumuhinzi kuko niwe muto

  2. Kamana Alexis

    February 24, 2021 at 18:29

    Horeco yagombye kubibazwa kuko ntiyubahirije inshingano zayo

Leave a Reply

Your email address will not be published.

Izindi wakunda

PanoramaTV Rwanda

https://www.youtube.com/watch?v=BgBhZVIypEs

Click here to Follow our YouTube Channel

Advertisement

Address:

KG 17 Av 37
Remera-ARJ/RMC House
Amahoro National Stadium
Registration Number: RMC/C/14/015
Accreditation: RURA/ICT/LIC/210181745

e-mail: editor.panorama.rw@gmail.com; panoramarw@gmail.com

Tel: 0788300359 -0733003020

Twitter: @PanoramaNewspa1; @reneanthere
Facebook: Panorama Newspaper

Services:

Panorama Newspaper, Animation, Conducting Community debates, Organizing Talk shows, Consultancy in Media, Photography, Newsletters, Magazines, Videos, Documentaries, Translation, Editing, Book publishing, Motion picture, video and television programme production activities, Motion picture, video and television programme postproduction activities
Motion picture, video and television programme distribution activities, Motion picture projection activities, Other information service activities n.e.c.
Other publishing activities, Publishing of newspapers, journals and periodicals
Radio broadcasting, Television programming and broadcasting activities

Copyright © 2021 Panorama.