Connect with us

Hi, what are you looking for?

Amakuru

Bamwe mu bashumba birukanwe ku kazi muri ADEPR bugarijwe n’ihungabana no gusuhuka

Pasteri Ndayizeye Isaie, Umuvugizi wa ADEPR.

Hashize amezi arenga atandatu abakozi ba ADEPR bagera ku 2000 birukanywe ku kazi nta nteguza, biturutse ku mavururwa y’igitaraganya yakozwe muri iryo torero. Hari abamaze gufata umwanzuro wo gusuhuka, abandi bahuye n’ihungabana ndetse hari n’abafite impungenge z’imitungo yabo ishobora gutezwa cyamunara n’amabanki.

Ibi bibazo byugarije abari abashumba n’abakozi ba ADEPR bishingiye ku Ibaruwa y’Urwego rw’Igihugu rw’imiyoborere -RGB, Ref. 160/RGB/CEO/CSD/2020, yo ku wa 02 Ukwakira 2020, Umukuru w’urwo rwego yandikiye uwari Umuvugizi wa ADEPR, uwari Perezida w’Inama y’Ubutegetsi ya ADEPR n’Umuyobozi wa Komite Nkemurampaka yakuyeho inzego ziteganywa n’amategeko ya ADEPR.

RGB yakuiyeho yakuyeho inzego za ADEPR zirimo Inteko rusange, Inama y’Ubuyobozi, Biro ya Komite Nyobozi na Komite Nkemurampaka. Hakuwe mu nshingano abari abakozi ba ADEPR bari mu nshingano bari mu bagize Inama y’Ubuyobozi.

Iyi baruwa ntiyigeze ivuga ko abakozi bahabwa ibyo bagenerwa n’amategeko, ntiyanagaragaza abagomba gusigara mu nshingano hakurikijwe icyo amategeko ateganya. Ntiyigeze kandi ivuga ko inzego z’imyubakire y’itorero ziseswa, kwirukana abakozi bisa no kubihimuraho, ndetse no kubaka inzego nshya za ADEPR.

Abashyizweho na RGB bayobowe na Pasiteri Ndayizeye Isaie, bihutiye kwirukana abashumba n’abandi bakozi guhera ku rwego rwa Paruwasi bashingiye ku ibaruwa ya RGB kandi hari amategeko shingiro na Ngengamikorere ya ADEPR atarigeze akurwaho ari nay o yagombaga kubahirizwa.

Mu gucukumbura uko ikibazo gihagaze ubu, Ikinyamakuru Panorama cyegereye bamwe mu bahoze ari abashumba muri ADEPR ndetse n’abakozi birukanwe, bagaragaza akaga barimo guhura na ko.

Bamwe mu batanze ibiganiro ariko amazina yabo tutari bugaragaze muri iyi nkuru, bavuze ko hari abashumba batangiye gusuhuka, bahunga aho bari batuye ndetse n’abo bayoboraga, batinya kwambarira ibicocero aho bambariye inkindi.

Umwe muri bo yagize ati “Hari abashumba bugarijwe n’ibibazo. Nk’ubu hari abagurishije udusambu twabo barimuka bajya gutura ahandi. Hari abari bafite inguzanyo mu mabanki zishyurwa binyuze ku mushahara, bicaye bategereje ko banki ziza guteza icyamunara ingwate batanze…”

Undi we yagize ati “Amabaruwa akimara gusohoka, dore ko yatanzwe igihugu cyitegura kwinjira mu bihe bikomeye byo kwibuka ku nshuro ya 27 Jenoside yakorewe Abatutsi, hari abahise bafatwa n’ihungabana rikomeye. Byabaye ngombwa ko bajyanwa mu bitaro gukurikiranwa. Yewe hari ibibazo by’uruhuri…”

Abandi bo icyo bahurizaho ni uko abashumba basuzuguwe kandi hari amategeko asanzwe agenga ADEPR ari na yo yari akwiye kugenderwaho. Bavuga ko hari abana bahinduriwe amashuri bigagamo kubera kubura uko babishyurira, …

Mu ibaruwa ya RGB isesa inzego za ADEPR ariko ntisese amategeko yayo, bamwe mu bakristo bavuga ko batunguwe n’ikintu kitigeze kibazo kandi gikomeye ko Itorero riyoborwa n’umugore. Mu ibaruwa ya RGB ingingo ya 3 igira iti “Ihaye Madamu Umuhoza Aulerie inshingano zijyanye n’imicungire y’abakozi n’umutungo kugeza igihe abazayobora umuryango mu gihe cy’inzibacyuho bazashyirirwaho.”

Umuhoza Aulerie, yihutiye gutegura ihererekanyabubasha nk’uko bigaragara mu ibaruwa ye No 561/A/1-2 yo ku wa 5 Ukwakira 2020, nyamara iya RGB yo ku wa 2 Ukwakira 2020 itarigeze imuha ubwo bubasha.

Uko gufata ibyemezo bidashingiye ku mategeko byatumye hirukanwa abashumba n’abandi bakozi bagera ku 2000, ugereranyijwe bashobora kuba barahembwaga amafaranga akabakaba Miliyari. Aba bose biteguye kujyana ADEPR mu nkiko kandi niramuka itsinzwe abakristo nibo bizagarukaho bishyura.

Umunyarwanda wambuwe uburenganzira bwe ndetse agahungabanywa ni we usabwa kuba umukristo mwiza w’intangarugero, urangwa n’indangagaciro kandi ukunda igihugu cye.

Ubuyobozi bw’inzibacyuho bwahonyoye amategeko bahindura imiterere y’Itorero nta tegeko bushingiyeho, nyamara Itorero ubwaryo ryarisangaga mu gutegura ibikorwa by’iterambere ry’akarere (JADF). Inzego nshya za ADEPR wakwibaza akarere zizabarizwamo mu gihe Indembo na Paruwasi byakaswe bidashingiye ku mbibi z’imiyoborere y’igihugu nk’uko byari byakozwe.

Abakurikiranira hafi ibijyanye n’iri torero, bavuga ko imbibe nshya zashyizweho hagendewe ku byifuzo by’abafatanyabikorwa ba ADEPR b’i Burayi bo mu gihugu cya Suwedi. N’ubwo byakozwe nta tegeko rya ADEPR byashingiweho. Ikindi kivugwa ni uko inzego zakuweho ariko hagakomeza gukoreshwa Konti zari zisanzwe.

Ikindi kibangamye kivugwa muri ADEPR ni ugushyiraho abashumba bayobora za Paruwasi n’indembo hakoreshejwe amabaruwa nk’abakozi basanzwe bashyirwa mu kazi nyamara amategeko asanzwe ya ADEPR ateganya ko basengerwa, bakabona kuzamurwa mu ntera no guhabwa inshingano.

Abaganiriye n’Ikinyamakuru Panorama bavuga ko ibibazo Itorero ryagize ryabigize nk’Umuryango, ibikorwa byose bikwiye kuba bishingiye ku mategeko ari muri RGB ndetse n’ibiganiro ntibigendere ku marangamutima y’umuntu hato bitazana nk’igihe cy’umuhungu wa Salomo waciyemo Isiraheli ibice.

Twashatse kuvugana n’ubuyobozi bwa ADEPR ariko igihe cyose twabahamagaye ntibatwitabye ariko ubutumwa bugufi twahawe n’umuvugizi wa ADEPR yatubwiraga ko bari mu butumwa. Igihe azaduhera umwanya tuzabagezaho icyo babivugaho.

Rwanyange Rene Anthere

Click to comment

Leave a Reply

Your email address will not be published.

Izindi wakunda

PanoramaTV Rwanda

https://www.youtube.com/watch?v=BgBhZVIypEs

Click here to Follow our YouTube Channel

Advertisement

Address:

KG 17 Av 37
Remera-ARJ/RMC House
Amahoro National Stadium
Registration Number: RMC/C/14/015
Accreditation: RURA/ICT/LIC/210181745

e-mail: editor.panorama.rw@gmail.com; panoramarw@gmail.com

Tel: 0788300359 -0733003020

Twitter: @PanoramaNewspa1; @reneanthere
Facebook: Panorama Newspaper

Services:

Panorama Newspaper, Animation, Conducting Community debates, Organizing Talk shows, Consultancy in Media, Photography, Newsletters, Magazines, Videos, Documentaries, Translation, Editing, Book publishing, Motion picture, video and television programme production activities, Motion picture, video and television programme postproduction activities
Motion picture, video and television programme distribution activities, Motion picture projection activities, Other information service activities n.e.c.
Other publishing activities, Publishing of newspapers, journals and periodicals
Radio broadcasting, Television programming and broadcasting activities

Copyright © 2021 Panorama.