Wilson Nsabamahoro
Ikipe ya Liverpool yahabwaga amahirwe yo kwegukana igikombe cya Shamiyona y’u Bwongereza yatsindiwe na Everton mu mukino w’ihangana uzwi nka Merseyside Derby uhuza aya makipe. Ibi byatumye Liverpool isigara inyuma mu rugamba rwo guhanganira igikombe aho Arsenal ya mbere yayisizeho amanota atatu.
Amakipe atatu Arsenal, Liverpool na Manchester City zakubanaga cyane ku mwanya wa mbere. Umwanya wa mbere zawusimburanwagaho ku buryo nta kipe yawumaragaho imikino itatu. Ibi byatumye abakurikirana iyi shampiyona bavuga ko yaryoheye abayireba cyane ko intsinzi zagiye zisaranganywa ku makipe ya mbere yose bituma adasiganwa cyane.
Umukino wa Everton waje ari nk’ inzozi mbi ku bakunzi ba Liverpool nk’ uko usanzwe ubagora. Umukino utangira Liverpool igerageza gutsinda igitego hakiri kare ariko ubwugarizi bwa Everton bukababera ibamba.
Bidatinze ku munota wa 27 Jarrad Branthwaite yafunguye amazamu atsindira Everton igitego. Igitego cya Branthwaite cyaje Everton yari yagumye gusatira ariko amahirwe ntabasekere. Ubwugarizi bwa Liverpool bwari bwazonzwe cyane n’ abakinnyi basatira ba Everton barimo Abdoulaye Doucoure na Dominic Calvet-Lewin. Igice cya mbere cyarangiye Everton iri imbere n’ igitego 1 ku busa.
Igice cya kabiri Everton yaje yakajije umurego. Abasore bakambitse ku izamu rya Liverpool, biha intego yo kuhava babonye igitego. Ubwugarizi bwa Liverpool bwirwanagaho cyane ariko umutwe wa Dominic Lewin ku munota wa 56 wongera gushengura abakunzi ba Liverpool. Uyu mwongereza yashimangiye intsinzi umukino urangira Everton iwegukanye.
Umwongereza Sean Deyche utoza Everton yari yiteguye guhagarika umuvuduko wa mugenzi we Jurgen Klopp wa Liverpool. Uyu mutoza usanzwe uzwiho gukina yugarira cyane asanzwe ahagama amakipe manini akayabuza kugera ku ntego zayo nyamara Everton yo iba iri mu murongo utukura.
Impungenge zabaye nyinshi ku bafana ba Liverpool bari kugirana ibihe bya nyuma n’umutoza wabo Jurgen Klopp. Uyu mutoza yatangaje ko uyu mwaka ari wo wa nyuma atoza Liverpool. Yifuzaga gusiga abahaye Shamiyona ya kabiri cyane ko yabigerageje kenshi ariko ntibimuhire.
Nyuma yo gutsindwa uyu mukino Liverpool yisanze ku mwanya wa kabiri. Arsenal ni yo iyoboye urutonde rw’agateganyo n’amanota 77 ikaba irusha Liverpool amanita 3 mu gihe Man City itarakina ibirarane bibiri ifite amanita 73.
Shampiyona y’u Bwongereza iragaruka mu mpera z’iki cyumweru Liverpool isura West Ham ya David Moyes kuri London Stadium na ho Arsenal isure Tottenham. Man city idafite Erling Halland irakirwa na Brighton kuri American Express saa tatu z’ijoro.
Nitsinda ibirarane n’imikino isigaje, City izahita itwara igikombe cya kane cyikurikiranya. Bibaye, bwaba ari ubwa mbere kuva Shampiyona y’u Bwongerza yakinwa mu 1888.
