Mu rwego rwo kugoboka imiryango itishoboye isanzwe ibaho ari uko yakoze, imiryango itegamiye kuri Guverinoma ifite mu nshingano zayo ubutabera n’ubuzima, ibitewemo inkunga n’Umuryango w’Ubumwe bw’Uburayi (EU), imiryango 2000 irahabwa ubufasha bw’ibiribwa mu rwego rwo guhangana na Koronavirusi.
Ku wa 22 Kamena 2020, imiryango itari iya Guverinoma ariyo Ihorere Munyarwanda, Strive Foundation, Ihuriro ry’imiryango itari iya Guverinoma (Rwanda NGOs Forum) na HDI, bishyize hamwe hagamijwe guhuza imbaraga, mu gikorwa cyo gufasha abatishoboye babaho mu buzima udasanzwe.
Abahabwa inkunga barimo abakora uburaya, ababana bahuje ibitsina (MSM), abangavu babyariye iwabo, abafite ubwandu bw’agakoko gatera SIDA n’abandi batishoboye bose hamwe bagera ku 2000, bahabwa ibiribwa birimo Kawunga, Umuceri, ibishyimbo, amata, umunyu, isukari, ibikoresho by’isuku, hakiyongeraho n’amafaranga ibihumbi 10 yo kugura amakara.
Abagenerwabikorwa bavuga ko inkunga y’ibiribwa bahawe igiye kubahindurira ubuzima kuko ubusanzwe babaho ari uko bakoze none bakaba nta mirimo bafite ituma binjiza igitunga umuryango.
Consolée …ahagarariye abagore bakora uburaya. Ashima cyane abagiraneza babahaye inkunga, kuko bazirikanye abagowe n’imibereho, muri ibi bihe bya COVID-19. Agira ati «Hari bamwe muri twe bamaraga iminsi itatu batabonye ibyo kurya, ibyo bituma iyo babonye umugabo batitaye uko yaba ameze kose bemera kwishora ariko bakabona uko babaho. Ntawe uba agitekereza ko anashobora kwandura Koronavirusi. Iyi nkunga iradufasha guhangana n’iki cyorezo.»
Ufitamahoro Alice avuga ko yatewe inda afite imyaka 17 ahita ava mu ishuri. Ubu yari atunzwe no gutunganya no gutaka ahakorerwa ubukwe n’ibindi birori, ariko icyorezo cya Koronavirusi cyatumye nta kazi yongera kubona, akaba atorohewe n’imibereho.
Agira ati “Icya mbere ni uko iyi nkunga igiye kumfasha gutunga umwana wanjye ndetse na barumuna banjye babiri tubana. Iyo umuntu afite ibimutunga ntawe ushobora gupfa kumushuka. Ibi kandi biradufasha gukomeza guhangana na Koronavirusi.”
Avuga kuri iki gikorwa, Muramira Bernard, uhagarariye ihuriro ry’imiryango itari iya Leta iharanira ubuzima n’ubutabera, avuga ko bahuje imbaraga kugira ngo bafashe abaturage bafite ibibazo byihariye, bagizwe ingaruka na COVID-19, bo mu turere tugize Umujyi wa Kigali, Akarere ka Rwamagana n’aka Rubavu.
Agira ati “Hari abantu bafite ibibazo byihariye noneho aho COVID-19 iziye kandi itunguranye babuze akazi kandi ariko kababeshagaho n’imiryango yabo. Abo barimo abakora uburaya, abana bahuje igitsina, abangavu babyariye iwabo, ababana n’agakoko gatera SIDA n’indi miryango itishoboye ifite abana bari munsi y’imyaka itanu. Nk’abafata imiti yo guhangana n’agakoko gatera SIDA ntiborohewe no kubona ibibatunga kandi byujuje intungamubiri muri ibi bihe bitoroshye. Ntidushaka rero ko bava iwabo ngo bajye gushaka amafaranga yo kubatunga, bityo baveho bakurayo n’icyorezo cya COVID-19.”
Ambasaderi w’u Budage mu Rwanda, Dr. Thomas Kurz, avuga ko basanzwe bafasha u Rwanda guhangana n’ingaruka za COVID-19, bakaba banafite imishinga myinshi bafashije muri ibi bihe bya gahunda ya Guma mu rugo, cyane cyane mu kwita ku baturage batishoboye. Avuga ko Ambasade y’u Budage mu Rwanda ifite imishinga myinshi bagomba gufasha cyane cyane abaturage bari mu mibereho idasanzwe.
Uhagarariye Umuryango w’Ibihugu by’i Burayi mu Rwanda, Amb. Nicolas Belomo, avuga ko uyu mushinga ari igice cya Team Europe Response mu gufasha abanyarwanda bafite imibereho ikomeye muri ibi bihe bya COVID-19. Ashimira ihuriro ry’imiryango itari iya Leta ifite mu nshingano kwita ku buzima n’ubutabera, kuba barategereje ku batishoboye bakaba baje kubashyigikira mu guhangana n’ingaruka za COVID-19.
Agira ati “Dukorana na Guverinoma y’u Rwanda mu gufatasha abaturage mu rwego rw’ubukungu n’imibereho y’abaturage, mu rwego rwo guhangana n’ibibazo bibugarije. Dukorana kandi n’imiryango itari iya Leta mu rwego rwo kuzuzanya n’inzego z’ibanze mu gufasha abaturage gukemura ibibazo biba bibugarije.”
Mu rwego rwo guhangana n’ingaruka za COVID-19, Umuryango w’ibihugu by’i Burayi uvuga ko wagiranye amasezerano y’ubufatanye n’u Rwanda afite agaciro ka miliyari 22. Igikorwa cyo gufasha imiryango 2000 yahuye n’ingaruka za COVID-19 cyatwaye amafaranga y’u Rwanda angana na miliyoni 159.
Rwanyange Rene Anthere
