Nubwo u Rwanda rukomeje gushora imari no gushyira imbaraga mu bikorwa byo guhangana n’imihindagurikire y’ikirere, raporo nshya zashyizwe ahagaragara zigaragaza ko ingaruka zayo zikomeje kwiyongera ndetse n’ubushobozi bwo kuzihanganira bukaba bwaragabanutse.
Ibi byagaragajwe kuri uyu wa 3 Kamena 2026 muri raporo enye z’ingenzi zatangajwe n’Ikigo cy’Igihugu gishinzwe Kubungabunga Ibidukikije (REMA), zirimo Raporo ya mbere y’u Rwanda y’Igenzura n’Itangazwa ry’Amakuru ku Mihindagurikire y’Ikirere (BTR1), gahunda nshya y’Igihugu yo kugabanya imyuka ihumanya ikirere kugeza muri 2035 (NDC 3.0), ubushakashatsi bwakozwe muri 2025 ku rugero rw’ingaruka z’imihindagurikire y’ikirere (CCVIA), ndetse na gahunda y’Igihugu yo kubungabunga urusobe rw’ibinyabuzima (NBSAP).
Imibare ikubiye muri raporo ya CCVIA igaragaza ko igipimo cyerekana intege nke z’u Rwanda mu guhangana n’imihindagurikire y’ikirere cyazamutse kiva kuri 0.395 muri 2018 kigera kuri 0.524 muri 2025. Ibi bivuze ko abaturage n’ibikorwa by’iterambere bikomeje kwibasirwa cyane n’ibiza biterwa n’imihindagurikire y’ikirere.
Raporo ya BTR1 na yo yerekana ko hagati ya 2014 na 2023, ibiza byatewe n’imvura nyinshi, imyuzure, inkangu n’amapfa byahitanye abantu 1.595, bikomeretsa 2.368, byangiza inzu zirenga 62.000 ndetse byangiza hegitari zisaga 38.000 z’ubutaka bwahingwagaho.
Intara y’Iburasirazuba n’iy’Amajyepfo ni zo zagaragajwe nk’izifite ibyago byinshi kurusha izindi, mu gihe uturere twa Nyagatare, Gatsibo, Ngoma, Kamonyi na Ngororero turi mu twibasiwe cyane n’ingaruka z’imihindagurikire y’ikirere.
Nubwo bimeze bityo ariko, raporo zigaragaza ko hari intambwe igihugu kimaze gutera. Kugeza muri 2024, u Rwanda rwari rumaze kugabanya imyuka ihumanya ikirere ingana na toni miliyoni 1,59 za CO₂, bingana na 36% by’intego rwihaye yo kugabanya iyi myuka bitarenze muri 2030.
Muri gahunda nshya ya NDC 3.0, u Rwanda rwihaye intego yo kugabanya imyuka ihumanya ikirere ku rugero rwa 53% bitarenze muri 2035 ugereranyije n’uko yakomeza kwiyongera hatagize igikorwa. Kugira ngo ibi bishoboke, igihugu kizakenera miliyari 12 z’Amadolari ya Amerika, aho 82% by’ayo mafaranga biteganyijwe ko azava mu nkunga mpuzamahanga.
Abasesenguzi bavuga ko ubu bushakashatsi butanga ubutumwa bukomeye ko nubwo u Rwanda rukomeje gutera intambwe mu kurengera ibidukikije no kugabanya imyuka ihumanya ikirere, ingaruka z’imihindagurikire y’ikirere zikomeje kwiyongera ku buryo hakenewe kongera imbaraga mu bikorwa byo kurinda abaturage, ibikorwa remezo n’ubuhinzi, ari byo bishingiyeho imibereho ya benshi.
Izi raporo zizifashishwa mu igenamigambi ry’Igihugu no mu gukurura ishoramari rikenewe mu bikorwa byo guhangana n’imihindagurikire y’ikirere no kubungabunga ibidukikije mu myaka iri imbere.
Kigali – REMA yamuritse raporo enye z’ingenzi zirimo raporo y’u Rwanda y’igenzura n’itangazwa ry’amakuru ku mihindagurikire y’ikirere
