Panorama
Ishyaka riharanira Demokarasi n’imibereho myiza y’abaturage (PSD), muri Kongere yaryo y’igihugu idasanzwe yo ku wa 24 Werurwe 2024, ryatoye kandi ryemeza gushyigikira umukandida w’Umuryango FPR Inkotanyi, Paul Kagame, mu matora ya Perezida wa Repubulika ateganyijwe ku itariki ya 15 Nyakanga 2024.
Perezida w’Ishyaka PSD, Dr Vincent Biruta, yagaragaje ko iyi Kongere ifite umwihariko, kuko irimo ibikorwa byinshi kandi bikomeye, cyane cyane amatora y’Umukuru w’Igihugu n’ay’Abadepite mu Nteko Ishinga Amategeko.
Muri iyi Kongere yo ku rwego rw’Igihugu, abayoboke ba PSD bemeje Manifesto y’ishyaka, banemeza umukandida w’Ishyaka ku mwanya wa Perezida wa Repubulika mu matora ateganyijwe muri Nyakanga 2024.
Perezida w’ishyaka PSD, Dr. Vincent Biruta, yagaragaje ko Perezida Paul KAGAME amaze kugeza Abanyarwanda kuri byinshi kandi ko abarwanashyaka b’Ishyaka PSD biteguye gukomezanya na we kugira ngo ibyo byiza bikomeze.
Mu matora y’Umukuru w’igihugu yo mu 2017 na bwo Ishyaka PSD ryashyigikiye Perezida Paul Kagame, haba mu kumwamamaza no kumutora. Mu matora yo mu 2010 ni bwo PSD iheruka gupiganirwa Umwanya w’umukuru w’Igihugu, icyo gihe Dr. Jean Damascene Ntawukuriryayo ni we wari umukandida w’iryo shyaka, akaba yaregukanye umwanya wa 2 inyuma ya Perezida Paul Kagame.
