Wilson NSABAMAHORO
Ishyirahamwe ry’ umukino wa Basketball mu Rwanda ryateguye irushanwa ryo kwibuka abari abakinnyi b’uyu mukino bazize Jenoside yakorewe abatutsi. Iryo rushanwa rizamara iminsi ibiri ribera muri BK Arena.
Amakipe azitabira ni Patriots BBC, APR BBC, REG BBC na Tigers mu bagabo ndetse na APR WBBC, GS Marie Reine RWAZA, REG WBBC na Kepler WBBC.
Ikipe ya Espoir BBC yatangije iri rushanwa bitunguranye ntizitabira iyi nshuro kuko ubuyobozi bwa FERWABA buvuga ko bashatse ko hitabira amakipe yabikoreye akaba ari muri ane ya mbere ku rutonde rw’imikino ibanza ya shampiyona.
Uko gahunda y’imikino iteye:
Ku wa Gatanu tariki 19 Mata 2024 saa munani z’amanywa hazabanza imikino izahuza amakipe y’abagore aho APR WBBC izatangira ikina na Kepler hakurikireho umukino uzahuza GS Marie Reine Rwaza na REG WBBC. Uyu mukino uzakurikirwa n’imikino y’amakipe y’abagabo aho saa kumi n’ebyiri Patriots izesurana na Tigers hanyuma saa mbiri z’ijoro hagakurikiraho umukino ukomeye uzahuza APR BBC na REG.
Irushanwa rizakomeza bukeye bwaho tariki 20 Mata hakinwa umwanya wa gatatu mu bagore I saa munani z’amanywa naho umwanya wa gatatu mu bagabo ukazakomerezaho ku isaha ya saa kumi z’umugoroba.
Imikino ya nyuma izatangirana n’umukino wo ku ruhande rw’amakipe y’abagore uzaba saa kumi n’ebyiri na ho uwo kuruhande rw’ amakipe y’abagabo ube saa mbiri z’ijoro.
Ni irushanwa rizakinwa n’amakipe yo mu cyiciro cya mbere; ane mu bagabo ndetse n’ane mu bagore. Amakipe azitabira iri rushanwa ni ayashoje ku rutonde ari muri ane ya mbere mu mikino ibanza ya Shampiyona. Imikino izatangira tariki ya 19 isoze tariki 20 Mata 2024 ikazabera muri BK Arena.
Igikorwa cyo Kwibuka abakinnyi n’abakunzi ba Siporo bazize Jenoside yakorewe Abatutsi mu mikino itandukanye kizwi nka Genocide Memorial Tournament cyatangiye mu 2013. Amashyirahamwe y’imikino ku bufatanye na Komite Olempike bitewe inkunga na Minisiteri ya Siporo ni yo ategura amarushanwa mu rwego rwo kuzirikana abari muri iyo mikino itandukanye. Kuri ubu twibuka ku nshuro ya 30 abazize Jenoside yakorewe Abatutsi, Ishyirahamwe ry’umukino wa Basketball ryateguye irushanwa ryo Kwibuka abari abakinnyi bazize Jenoside, rizahuza amakipe ane ya mbere muri Shampiyona y’u Rwanda.
Ubwo iri rushanwa ryaherukaga gukinwa mu 2019 ryari ryegukanwe na REG mu bagabo ihigitse Patriots BBC ku manota 74 kuri 71. Ni mu gihe mu bagore ryegukanwe na The hoops itsinze IPRC HUYE WBBC.
