Bamwe mu bageze mu zabukuru bo mu karere ka Huye, Umurenge wa Ngoma ku kigonderabuzima cya CUSP (Centre Universitaire de Santé Publique) cyo ku Mberabyombi bishimiye guhabwa urukingo rwa COVID-19.
Kuri uyu wa 8 Kamena 2021, mu gihugu hose ku bantu bageze mu zabukuru guhera ku myaka 60 bahawe urukingo rwa COVID-19. Abaruhawe biyemeje gukomeza gukaza ingamba no gukangurira abandi gukomeza kwirinda COVID-19.
Ntegano Canisius umwe muri aba baturage baganiriye n’ikinyamakuru Panorama yavuze ko yishimye guhabwa urukingo rwa COVID-19 rwa mbere rwa Pfizer yiyemeza gukomeza gukaza ingamba zo kwirinda COVID-19 kuko anayikirutse.
Uyu mugabo w’imyaka 61 y’amavuko yagize ati: “Ndishimye kandi nibyo agaciro kuba mpawe urukingo rwa mbere rwa Pfizer rwa COVID-19. Nzakomeza gukaza ingamba kuko COVID-19 iracyariho no mu mezi atatu ashize ndayikirutse”.
Ubwo twaganiraga na Ntegano yari amaze isaha imwe afashe urukingo, avuga ko ameze neza nta kibazo kindi yagize. Yagize ati: “Namara abandi impungenge kuko kugeza ubu nta kibazo nari nagira nyuma yo gutegereza iminota cumi n’itanu maze guhabwa urukingo kugeza magingo aya”.
Undi mubyeyi waganiriye n’ikinyamakuru Panorama utifuje ko amazina ye atangazwa yavuze ko yishimye urukingo kandi arufitiye icyizere hamwe no gukomeza gukaza ingamba zo kwirinda COVID-19.
Yagize ati: “Ndishimye kandi n’abandi ntibazagire ubwoba urukingo ntacyo rutwara. Ngiye gukomeza gukaza ingamba kuko COVID-19 iracyariho”.
Umuyobozi w’ikigo nderabuzima cya CUSP, Ntakirutimana Esdras, avuga ko kuva batangira gukingira nta muturage wagize ikibazo. Kuri iki kigo nderabuzima bazatanga inking 90.
Yagize ati: “Uyu munsi turatanga urukingo rwa mbere rwa Pfizer rwa COVID-19 urundi ni mu kwezi gutaha”.
Uyu muyobozi yakomeje avuga ko ubushakashatsi bwakozwe bugaragaza ko urukingo rwa COVID-19 rurinda COVID-19 ku kigero cya 95% ariko yaba abarufashe n’abatararufata bakwiye gukomeza kwirinda COVID-19, kuko iracyahari.
Imibare ya Minisiteri y’Ubuzima igaragaza ko kugeza ku wa 7 Kamena 2021, mu Rwanda abamaze guhabwa urukingo rwa COVID-19 bangana na 350,400. Abamaze kwandura bangana na 27,307 abakize bagera kuri 26,254 abamaze guhitanwa na cyo ari 360 mu gihe ibipimo byose bimaze gufatwa ari 1,475,285.
Rukundo Eroge
