Raporo y’uko ruswa ihagaze ku isi yerekana ko u Rwanda ruri ku mwanya wa mbere muri Afurika y’Uburasirazuba no kuwa gatatu muri Afurika, rukagira amanota 58%.
Mu mwaka wa 2024 rwari rufite amanota 57%, muwa 2025 rwazamutseho inota rimwe.
Corruption Perceptions Index (CPI) 2025 ni raporo yasohowe na Transparency International (TI), ikaba yanditsemo ko u Rwanda rwateye intambwe nziza mu kurwanya ruswa, bikarushyira ku mwanya wa 41 ku rwego rw’isi ruvuye kuwa 43 rwariho mu mwaka wa 2024.
Rwo na Botswana biri ku mwanya umwe muri Afurika mu gihe Seychelles iza ku mwanya wa mbere n’amanota 68% mu gihe Cap Vert iri kuwa Kabiri n’amanota 62%.
Muri Afurika y’Uburasirazuba, u Rwanda rukurikirwa na Tanzania (umwanya wa 84 n’amanota 40%), hakazaho Kenya (ku mwanya wa 130 n’amanota 30%), Uganda (ku mwanya wa 148 n’amanota 25%), Repubulika ya Demukarasi ya Congo (ku mwanya wa 163 n’amanota 20%), n’u Burundi (umwanya wa 167 n’amanota 17%).
Raporo CPI 2025 yerekana ko mu mwaka wa 2022 u Rwanda rwari rufite amanota 51%, muwa 2023 rugira amanota 53%, muwa 2024 rugira amanota 57% naho mu mwaka wa 2025 rugira amanota 58%.
Mbere y’aho, amanota meza u Rwanda rwari rwarabonye ni 54% rwabonye mu myaka ya 2015, 2016 no mu mwaka wa 2020), rwabonye kandi amanota 56% mu mwaka wa 2018, na 57% mu mwaka wa 2024.
Ku rwego rw’isi, imyanya myiza u Rwanda rwaragezeho ni uwa 43( hari mu mwaka wa 2015 no mu 2024), n’umwanya wa 48 mu mwaka wa 2017 no muwa 2018.
Abakoze iriya raporo bashingiye ku byatangajwe n’abantu b’ingeri zitandukanye barimo abo mu Ihuriro mpuzamahanga ry’ubucuruzi World Economic Forum (73% – avuye kuri 69% mu 2024), muri Banki Nyafurika Itsura Amajyambere (69%), abo mu kigo World Justice Project Rule of Law Index (60 – avuye kuri 59% mu 2024), abo mu kigo Global Insights Country Risk Ratings (59%), abo muri Banki y’isi(51%), abo mu kigo Bertelsmann Foundation Transformation Index (47%), n’abo mu kigo Varieties of Democracy Project (46% – avuye kuri 45% mu 2024).
Raporo ya CPI yatangiye gukorwa mu mwaka wa 1995, ikaba igipimo cy’uko ruswa iteye hirya no hino ku isi igashyira ku rutonde ibihugu 182, aho ibifite igipimo kiri kuri zero biba birimo ruswa nyinshi mu gihe ibifite ku 100 biba bihagaze neza mu guhangana na ruswa.
