Minisitiri w’Ubutegetsi bw’Igihugu, Habimana Dominique, yifatanyije n’abaturage bo mu Karere ka Gicumbi mu gikorwa cy’Umuganda usoza ukwezi kwa Mata 2026, cyibanze ku bikorwa biteza imbere imibereho myiza n’imirire iboneye.
Uyu muganda wabereye mu Mudugudu w’Icyitegererezo wa Kaniga, uherereye mu Murenge wa Kaniga, wubatswe ku bufatanye n’umushinga wa Green Gicumbi. Abaturage bawitabiriye bakoze ibikorwa bitandukanye birimo gutunganya uturima tw’igikoni, gutera imboga ndetse no gufata ingamba zo kurwanya isuri.
Iki gikorwa cyari kigamije gukomeza gushishikariza abaturage kwihaza mu biribwa no kwita ku bidukikije, bityo bikabafasha kwirinda indwara ziterwa n’imirire mibi.
Mu ijambo yagejeje ku baturage, Minisitiri Habimana yabashimiye uruhare bagira mu kwiteza imbere, anabagaragariza ko nubwo hari aho bitwaye neza, hakiri ibibazo bikwiye kwitabwaho, cyane cyane igwingira ry’abana.
Yagize ati: “Numvise ko muri raporo zitandukanye hari aho mwagiye muza imbere, muri uyu Murenge mwaje imbere umwaka ushize mu bijyanye no kwishyura ubwisungane mu kwivuza Mitiweli, ndetse nama raporo yagaragaje ko no mubijyanye na Ejo Heza naho mu Murenge wanyu uhagaze neza uri mu Mirenge y’imbere nabyo turabibashimiye cyane.”
Yakomeje yibutsa abaturage ko bidakwiye ko bagera ku ntera nziza muri bimwe, ariko bagasigara inyuma mu bindi by’ingenzi ku mibereho yabo.
Ati: “Ariko hari n’ahandi muza inyuma, ntabwo waba uwa mbere muri Mitiweli, ngo ube uwa mbere muri Ejo Heza, hanyuma ngo ube n’uwambere mu bijyanye n’igwingira, umwanya wa mbere mu igwingira ntabwo ari uwanyu ntabwo muwukwiriye.”
Minisitiri Habimana yashimangiye ko Akarere ka Gicumbi gafite ubushobozi buhagije bwo guhangana n’iki kibazo, asaba abaturage gufata ingamba zihamye zo kurwanya igwingira.
Ati: “Gicumbi mufite byose bikwiriye kugirango igwingire murirwanye murihashye kugirango mugire abana bafite ubuzima bwiza bafite imikurire myiza, bazira imirire mibi, bazira igwingira.”
Muri uwo muganda kandi, abaturage icyenda bo mu miryango itishoboye bahawe inka mu rwego rwo kubafasha kwiteza imbere, aho zimwe zatanzwe n’abafatanyabikorwa, izindi zitangwa n’Inama Njyanama y’Akarere ka Gicumbi.
Iki gikorwa cyanahuriranye no gusoza ukwezi kwahariwe Umujyanama, aho abajyanama b’ubuzima bari bamaze iminsi basura abaturage, babagezaho ubutumwa butandukanye bubafasha guteza imbere imibereho myiza no kurushaho kwirinda indwara.
Minisitiri w’Ubutegetsi bw’Igihugu Habimana Dominique yifatanyije mu muganda usoza ukwezi i Gicumbi
