APR FC yasozanyije shampiyona ya BK Pro League 2025/2026 intsinzi, nyuma yo gutsinda umukino w’umunsi wa nyuma, aho yakina na Gicumbi FC umukino ukaba warangiye ari ibitego 2-0, bityo inahita ishyikirizwa igikombe cy’iyi shampiyona nka BK Pro League National Champions 2025/2026.
Ni umukino wari witabiriwe n’abafana benshi, aho APR FC yagaragaje umukino wihariye wuzuyemo guhuza imbaraga, ubuhanga n’ishyaka, bikayifasha gusoza shampiyona iri ku mwanya wa mbere.
Nyuma y’umukino, habaye umuhango wo guha ikipe igikombe, aho abayobozi b’amarushanwa n’abafatanyabikorwa ba shampiyona bashimiye APR FC ku musaruro mwiza yagaragaje mu gihe cy’uyu mwaka w’imikino.
Abakinnyi ba APR FC n’abatoza bagaragaje ibyishimo bikomeye, bavuga ko iki gikombe kije ari igisubizo cy’imbaraga, imyitozo ikomeye n’ubufatanye bw’abagize ikipe yose kuva ku bakinnyi kugeza ku buyobozi.
Umutoza w’iyi kipe yashimangiye ko intsinzi itavuye ku mukino umwe gusa, ahubwo ari urugendo rurerure rwaranzwe n’ikinyabupfura, gukorera hamwe no kudacika intege mu bihe bikomeye bya shampiyona.
Iyi ntsinzi ni nayo yashyize akadomo ku mwaka w’imikino wa 2025/2026, APR FC ikaba yegukanye igikombe cy’icyubahiro nk’ikipe ya mbere mu gihugu.
APR FC yatwaye igikombe cya shampiyona y’u Rwanda Bk Pro League 2026
