U Rwanda na Afurika y’Epfo byongeye kugaragaza ubushake bwo gukomeza kubaka umubano ushingiye ku bwizerane no ku nyungu rusange, nyuma y’ibiganiro byahuje abayobozi bakuru bashinzwe ububanyi n’amahanga b’ibihugu byombi.
Ibi byagarutsweho nyuma y’uruzinduko rw’akazi rwa Minisitiri w’Ububanyi n’Amahanga n’Ubutwererane w’u Rwanda, Amb. Olivier J.P. Nduhungirehe, wagiriye muri Afurika y’Epfo ku butumire bwa mugenzi we, Minisitiri ushinzwe Umubano Mpuzamahanga n’Ubutwererane, Ronald O. Lamola.
Mu itangazo ryashyizwe ahagaragara nyuma y’uru ruzinduko, impande zombi zashimye intambwe imaze guterwa mu gusubiza ku murongo umubano hagati y’ibihugu byombi ndetse zemeranya gukomeza gukorana mu nzego zitandukanye zifitiye akamaro abaturage n’iterambere ry’umugabane wa Afurika.
Kimwe mu byafatiweho umwanzuro ni ugusubukura ibikorwa bya Komisiyo Ihuriweho y’Ubufatanye (JCC), izongera guteranira mu Rwanda mu mezi ya mbere y’umwaka wa 2027. Iyi komisiyo izaba urubuga rwo gukurikirana no guteza imbere imishinga n’amasezerano y’ubufatanye hagati y’impande zombi.
Abayobozi bombi banagaragaje ko hakenewe kongera umuvuduko mu bikorwa byagutsa ubufatanye, hagamijwe kubaka umubano urambye ushingiye ku bwubahane, ubwizerane n’inyungu zisangiwe.
Mu nzego zashyizwe imbere harimo koroshya urujya n’uruza rw’abaturage, guteza imbere ubucuruzi n’ishoramari, kongera ubukerarugendo, guteza imbere ubufatanye mu burezi no gushimangira umubano hagati y’abaturage b’ibihugu byombi.
Muri urwo rwego, hafashwe icyemezo cyo kongera gutanga visa ku Banyarwanda bafite pasiporo zisanzwe, gahunda iteganyijwe gushyirwa mu bikorwa mu gihe cy’umwaka umwe.
Uretse ibyo, impande zombi zanemeranyije gukomeza gushaka uburyo bwo kongera ubufatanye mu bukungu no guha umwanya munini urwego rw’abikorera kugira ngo rugire uruhare mu bikorwa by’iterambere.
Ibiganiro byanagarutse ku bibazo by’umutekano n’amahoro bikomeje kugaragara mu bice bitandukanye bya Afurika, birimo uburasirazuba bwa Repubulika Iharanira Demokarasi ya Congo, Mozambique, Sudani, Sudani y’Epfo, Somalia ndetse n’akarere ka Sahel.
Abayobozi b’ibihugu byombi bongeye gushimangira ko ibisubizo by’ibibazo byugarije Afurika bikwiye gushakirwa mu bufatanye buyobowe n’Abanyafurika ubwabo.
Guverinoma y’u Rwanda yavuze ko ibyavuye muri uru ruzinduko ari intambwe nziza mu gukomeza kuzamura urwego rw’umubano hagati y’ibihugu byombi, ndetse igaragaza ubushake bwo gukomeza gukorana bya hafi na Afurika y’Epfo mu guteza imbere amahoro, ubukungu n’iterambere ry’akarere.
Abasesenguzi mu bya dipolomasi bavuga ko uru ruzinduko rushobora gufungura amahirwe mashya mu mikoranire y’u Rwanda na Afurika y’Epfo, cyane cyane mu nzego z’ubucuruzi, ishoramari, uburezi n’ubufatanye bwa politiki ku rwego rw’umugabane wa Afurika.
Hasubukuwe ibikorwa bya Komisiyo Ihuriweho y’Ubufatanye ndetse na visa ku banyarwanda bafite pasiporo zisanzwe hagati y’u Rwanda na Afurika y’epfo
