Rene Anthere Rwanyange
Minisitiri w’Intebe Dr Justin Nsengiyumva, atangaza ko nta mahoro arambye yaboneka mu burasirazuba bwa Repubulika ya Demokarasi ya Congo ibibazo bidakemuwe bihereye mu mizi, kuko intandaro y’amakimbirane mu karere ishingiye kuri politiki.
Ibi Minisitiri w’Intebe yabigarutseho mu Nteko rusange ya 81 y’Umuryango w’Abibumbye ibera i New York , yitabiriwe n’ibihugu 193. Insanganyamatsiko y’iyi nama igira iti “Kugarura icyizere, gucunga impinduka: Umuryango w’Abibumbye utanga ibisubizo kuri bose.”Mu Ijambo rye, Dr Nsengiyumva yatangaje ko intandaro z’amakimbirane yo mu burasirazuba bwa Repubulika ya Demokarasi ya Congo (DRC) zishingiye ku bibazo bimaze igihe, guhezwa ndetse n’imiyoborere idahwitse.
Agira ati “Intandaro z’amakimbirane yo mu burasirazuba bwa Repubulika ya Demokarasi ya Congo, ni iza politiki; kandi zishingiye ku bibazo bimaze igihe, guhezwa ndetse n’imiyoborere idahwitse. Bityo, n’umuti ugomba kuba uwa politiki.”
Minisitiri w’Intebe akomeza avuga ko umutwe w’iterabwoba wa FDLR ugikwirakwiza “ingengabitekerezo ya Jenoside”, ugakora ibikorwa by’ihohoterwa mu burasirazuba bwa DRC, ukabangamira umutekano w’u Rwanda, harimo ibitero byambukiranya umupaka. Atangaza ko amahoro arambye adashobora kuboneka hatabanje gukemurwa intandaro z’amakimbirane no kwita ku bibazo n’abarebwa n’aya makimbirane bose.
Ku bijyanye n’inzira zo gushakira umuti w’iki kibazo, Dr Nsengiyumva yashyigikiye amasezerano ya Washington hagati y’u Rwanda na DRC n’ibiganiro bya Doha hagati ya DRC na AFC/M23, ko ari intambwe igana mu cyerekezo cyiza.
Kugeza ubu, amakimbirane yo mu burasirazuba bwa Repubulika ya Demokarasi ya Congo, yatumye abanyekongo benshi bava mu byabo ndetse bamwe bakaba bamaze imyaka n’imyaka mu nkambi hanze y’igihugu cyabo, ariko kandi u Rwanda na DRC bakomeje gushinjanya gushyigikira imitwe yitwaje intwaro ikorera mu karere cyane cyane mu Burasirazuba bwa DRC.
