Panorama
Perezida wa Repubulika ya Demokarasi ya Congo (DRC), Félix Antoine Tshisekedi, yakoranyije Inama Nkuru y’Ingabo n’Umutekano, atanga amabwiriza mashya ku ngabo z’igihugu, yiswe ayo ‘kuzuza inshingano zo kurinda ubusugire bw’igihugu, abaturage n’ibyabo’.
Iyi nama yateraniye i Kinshasa mu Ngoro y’Umukuru w’Igihugu izwi nka ‘Cité de l’Union Africaine’, ku wa 14 Ukwakira 2026, igamije gusuzuma uko umutekano wifashe mu bice bitandukanye by’igihugu.
Muri iyi nama Umugaba Mukuru w’Ingabo za DRC (FARDC), yagaragarije abiyitabiriye isesengura ry’uko ibikorwa bya gisirikare byifashe mu bice bitandukanye by’igihugu, by’umwihariko ku mitwe y’ingabo ziri mu bikorwa byo kurinda ubusugire bw’igihugu.
Umuvugizi w’ingabo z’igihugu (FARDC), Maj. Gen. Sylvain Ekenge, nyuma y’inama yatangaje ko Perezida Kshisekedi nk’umugaba w’ikirenga w’ingabo z’igihugu yatanze amabwiriza asobanutse ku ngabo n’izindi nzego z’umutekano, agamije gutuma barushaho kuzuza inshingano zabo. Ayo mabwiriza agamije kurinda ubusugire bw’igihugu, abaturage n’ibyabo.
Iyi nama Nkuru y’umutekano iteranye nyuma y’iminsi ibiri, i Goma hatangirijwe umutwe wa Politiki n’igisirikare, witwa Frond pour la Réfondation de la Nation (FRN), uyobowe na Joseph Kabila wahoze ari Perezida wa DRC, yungirijwe n’abari abayobozi bakuru ba AFC/M23, yo yahise iseswa.
FRN izaba iyobowe na Joseph Kabila Kabange wahoze ari Perezida wa Repubulika ya Demokarasi ya Congo, na ho Corneille Nangaa na Bertrand Bisimwa bafatanyaga kuyobora AFC/M23 bagirwa ba Visi Perezida.
Général-Major Emmanuel Sultani Makenga wari Umugaba Mukuru w’Ingabo za AFC/M23 na we yagizwe Visi Perezida, akaba afite n’inshingano zo kuyobora urwego rw’Ingabo z’uyu mutwe zizakomeza kwitwa ARC.
Uyu mutwe uvuga ko ushaka kubaka Leta ishoboye kurinda abaturage, gutanga ubutabera, guha buri wese uburenganzira bw’ubwenegihugu, kugabanya umutungo w’igihugu mu buryo buboneye no guteza imbere ubumwe n’ubwiyunge by’Abanyekongo.