Ikigo cy’Igihugu gishinzwe Ubumenyi bw’Ikirere (Meteo Rwanda) kiratangaza ko mu kwezi k’Ugushyingo 2026, u Rwanda ruzagusha imvura iri hejuru y’impuzandengo y’isanzwe igwa muri iki gihembwe, kikaba gisaba abaturage gukurikiza amabwiriza yo kwirinda ingaruka zishobora guterwa n’iyo mvura.
Nk’uko iteganyagihe ry’iki kigo ribigaragaza, mu gihugu hose hateganyijwe imvura iri hagati ya milimetero 85 na 350, mu gihe isanzwe igwa muri uku kwezi iba hagati ya milimetero 76 na 278. Icyakora, mu gice cya nyuma cy’ukwezi, imvura izaba iri ku kigero cy’impuzandengo isanzwe igwa muri icyo gihe.
Meteo Rwanda ivuga ko mu Ntara y’Iburasirazuba, mu Mujyi wa Kigali no mu bice byinshi by’Intara y’Amajyepfo, imvura izaba iri hejuru gato y’impuzandengo isanzwe. Mu turere twa Nyamagabe, Nyamasheke na Karongi, mu bice byo hagati n’iby’uburasirazuba bya Rusizi, ndetse no mu majyaruguru ya Nyaruguru, hateganyijwe imvura nyinshi iri hagati ya milimetero 250 na 350.
Mu bindi bice birimo Musanze, igice kinini cy’Intara y’Iburengerazuba, ibice byinshi bya Gakenke, Burera na Huye, ndetse n’uduce tumwe twa Muhanga, Gisagara, Nyanza, Ruhango na Rulindo, hateganyijwe imvura iri hagati ya milimetero 185 na 250. Mu bice byinshi by’Intara y’Amajyepfo n’iy’Amajyaruguru, hamwe n’ibice byinshi bya Kigali n’uturere twa Nyagatare na Bugesera, imvura izaba iri hagati ya milimetero 135 na 185. Ahandi hasigaye mu gihugu hateganyijwe imvura iri hagati ya milimetero 85 na 135.
Ku bijyanye n’ubushyuhe, ku manywa buzaba buri hagati ya dogere Selisiyusi 20 na 30, mu gihe nijoro buzagabanuka bukagera hagati ya dogere 10 na 19. Uturere twa Bugesera, Kigali, Nyagatare, Gatsibo, Kayonza, Rwamagana na Ngoma ni tumwe mu duce duteganyijwemo ubushyuhe bwinshi buri hagati ya dogere 28 na 30.
Ku rundi ruhande, mu bice by’uburengerazuba bwa Musanze no mu majyaruguru y’uburengerazuba bwa Nyabihu, ubushyuhe bwo ku manywa buzaba buri hasi, hagati ya dogere 20 na 22. Hari kandi uduce twa Nyabihu, Musanze, Nyaruguru, Nyamagabe na Rusizi duteganyijwemo ubushyuhe bwo hasi buri hagati ya dogere 10 na 12 nijoro.
Meteo Rwanda inateganya ko umuyaga uzaba ufite umuvuduko uri hagati ya metero 4 na 12 ku isegonda mu bice bitandukanye by’igihugu. Umuyaga mwinshi kurusha ahandi uteganyijwe mu bice bimwe bya Karongi, Rutsiro, Rubavu, Nyabihu, Ngororero, Kamonyi, Bugesera na Kirehe, ndetse no mu bice bimwe bya Ngoma, Muhanga, Nyamagabe na Ruhango.
Iki kigo kirakangurira Abaturarwanda gukurikiza inama n’amabwiriza atangwa na Minisiteri ishinzwe Ibikorwa by’Ubutabazi (MINEMA) n’izindi nzego zibishinzwe, kugira ngo birinde impanuka n’ibindi byago bishobora guterwa n’imvura nyinshi iherekejwe n’umuyaga.
