Ikipe ya Arsenal FC yongeye kwinjira mu mateka yayo, nyuma yo kugera ku mukino wa nyuma wa UEFA Champions League ku nshuro ya kabiri, igikorwa yari imaze imyaka hafi 20 itageraho.
Ibi byabaye nyuma yo gutsinda Atlético Madrid igitego 1-0 mu mukino wo kwishyura wa 1/2, bikayihesha itike yo gukomeza ku giteranyo cy’ibitego 2-1, nyuma y’uko amakipe yombi yari yaranganyije 1-1 mu mukino ubanza wabereye muri Espagne.
Iyi kipe yo mu majyaruguru ya Londres mu Bwongereza, itozwa na Mikel Arteta, yitwaye neza igaragaza umukino wuzuye ubushishozi, by’umwihariko mu bwugarizi no gukoresha amahirwe make yabonye, igitego kimwe kikaba cyabaye igihagije ngo yegereze abakunzi bayo inzozi zo kongera kugera ku mukino wa nyuma.
Amateka agaragaza ko Arsenal itarigera yegukana iki gikombe, kuko iheruka kugera ku mukino wa nyuma muri 2006, aho yatsinzwe na FC Barcelona ibitego 2-1. Icyo gihe yari yakoze amateka yo kuba ikipe ya mbere yo mu mujyi wa Londres igeze kuri urwo rwego.
Nubwo itari yarabashije kwegukana igikombe, Arsenal ifite uburambe muri iri rushanwa kuko imaze gukina imikino irenga 200, igatsinda irenga 100, ndetse yigeze no kwitabira Champions League imyaka 19 yikurikiranya hagati ya 1998 na 2017.
Muri uyu mwaka w’imikino wa 2025/2026, iyi kipe yagaragaje imbaraga zidasanzwe, aho yageze ku mukino wa nyuma idatsinzwe mu mikino myinshi yayibanjirije, ikaba iri mu makipe agaragaza ko ashoboye guhatanira ibikombe bikomeye ku mugabane w’u Burayi.
Ku mukino wa nyuma, Arsenal izahura n’ikipe irazava hagati ya Bayern Munich na Paris Saint-Germain, zirakina umukino wa 1/2 wa nyuma. Uwo mukino wa nyuma uraba ari amahirwe akomeye kuri iyi kipe yo gushaka kwegukana igikombe cya Champions League ku nshuro ya mbere mu mateka yayo.
Arsenal ubwo yatsindaga Atletico mu mukino wa 1/2 cya UCL yahise yandika amateka yo kugera kuri Final ku nshuro ya kabiri kuva yashingwa
