Ku cyumweru tariki ya 11 Nzeri 2022 muri BK ARENA i Remera habaye imikino ya gatatu ya playoffs za nyuma muri shampiyona ya Basketball mu Rwanda. Amakipe ya REG Basketball Club mu bagore no mu bagabo yegukana intsinzi, zica amarenga yo kwegukana igikombe.
Nk’uko tubikesha mukeraugendo.rw, mu cyiciro cy’amakipe y’abagore, ikipe ya REG Basketball Club yatsinze APR Basketball Club iyirusha cyane ku manota 71 kuri 44. Yahise yuzuza intsinzi ebyiri kuri imwe ya APR. Mu mukino wa mbere REG BBC yatsinze APR BBC amanota 60 kuri 57 na ho ku mukino wa kabiri APR BBC yatsinze REG BBC ku manota 65 kuri 58.
Mu bagabo ikipe ya REG BBC yongeye kurusha Patriotes BBC iyitsinda amanota 82 kuri 75. Amanota y’intsinzi abasore nka Thomas Cleveland, Adonis Filer na bagenzi babo bayabonye mu gace (quart- temps) ka kane. Mu mukino wa mbere wa kamarampaka za nyuma Patriotes BBC yatsinze REG BBC ku manota 75 kuri 70 hanyuma mu mukino wa kabiri REG yari yatsinze Patriotes BBC ku manota 79 kuri 70.
Imikino izakomeza ku wa gatatu tariki ya 14 Nzeri 2022, ubwo hazaba umukino wa kane mu mikino itanu iteganyijwe muri izi playoffs za nyuma. REG BBC mu bagabo no mu bagore zifite amahirwe yo guhita zegukana igikombe cy’uyu mwaka niziramuka zitsinze imikino ya kane. Ariko kandi nanone biranashoboka ko APR BBC mu bagore na Patriotes BBC mu bagabo zakora iyo bwabaga zigatsinda umukino wa kane n’uwa gatanu zikaba zatwara ibikombe. Ni ugutegereza imikino yo ku wa gatatu kuko ariyo izatanga isura y’icyerekezo cy’ibikombe.
Ikipe izatwara igikombe cya shampiyona mu kiciro cy’amakipe y’abagabo izaba ibonye itike yo kuzahagararira u Rwanda mu irushanwa rya Basketball Africa League (BAL) ry’umwaka wa 2023. Na ho ikipe y’abagore izegukana igikombe izahagararira u Rwanda mu mikino ya Zone V, ari na yo ivamo amakipe ahagararira akarere mu gikombe cya Afurika.
Rwanyange Rene Anthere
