Ishami ry’Umuryango w’Abibumbye ryita ku Buzima (OMS) ryatangaje ko ku wa 11 Kamena 2020, Igihugu cya Bresil cyapfushije abantu 1300 mu gihe handuye 33,100. Ibi bikaba byagishyize mu Bihugu byugarijwe cyane na coronavirus ku Isi.
OMS ivuga ko abamaze kwandura ku rwego rw’Isi bakabakaba miliyoni 7,5 (7.460.415), abamaze gupfa basaga ibihumbi 419 (419.049) mu gihe abamaze gukira basaga miliyoni 3.7 (3.779.035). Ubwandu bukaba bukomeje kwiyongera ku Isi nk’uko ubwo ku wa kabiri tariki ya 9 Kamena 2020 abanduye basagaga ibihumbi 122 (122.732) hakaba harapfuye 4900, ku wa gatatu handuye abantu 136.547 mu gihe abapfuye ari 5.326.
Nubwo Brésil yugarijwe na coronavirus, Perezida Jair Bolsonaro, aherutse kuvuga ko Igihugu cye gishobora kwivana mu Ishami ry’Umuryango w’Abibumbye ryita ku Buzima (OMS) ngo kuko uyu muryango ukomeje kugaragaza ukubogama.
Uyu muyobozi kandi akomeje kuvanaho ingamba zose zigamije kwirinda ikwirakwira ry’iki cyorezo.
Kuri uyu wa 11 Kamena 2020, Leta Zunze Ubumwe za Amerika zo zapfushije abantu 982 mu gihe abanduye ari 20,852. Bakaba bakomeje kuza imbere mu kugira umubare w’abanduye n’abamaze gupfa benshi, abanduye ni 2.066.508, abamaze gupfa bo ni 115,137. Brésil iza ku mwanya wa Kabiri aho ifite abanduye 775,184 naho abamaze gupfa ni 39.797, u Burusiya buza ku mwanya wa gatatu kuko bufite abanduye 493.657, hamaze gupfa 6,358.
Mu Bwongereza handuye 290 143, hamaze gupfa 41 128. Naho muri Espagne handuye 289 360 hamaze gupfa 27 136.
Ku mugabane wa Afurika hamaze kugaragara abantu 212 092 banduye Corona virus, abamaze gupfa ni 5 718 naho abakize ni 97 185.
Igihugu kiza imbere mu kugira abafite ubwandu benshi ni Afurika y’Epfo kuko habarurwa abagera kuri 55 421, abamaze gupfa ni 1 210. Hakurikiraho Misiri ifite abamaze gupfa benshi kuri uyu mugabane, nk’uko ubu ibara abagera kuri 1 342 naho abanduye bose ni 38 284.
Muri Afurika y’Iburasirazuba ho, Kenya ni cyo Gihugu cyugarijwe cyane kuko hamaze kwandura abantu 3 094, abapfuye bakaba 89.
U Rwanda rufite abanduye 476, mu gihe hamaze gupfa abantu babiri naho abamaze gukira akaba ari 307, mu Bugande hari abanduye 665, Tanzania ifite abanduye 509 hamaze gupfa 21, mu Burundi handuye abantu 83 hapfa umwe naho muri Sudan y’Epfo hamaze kwandura abantu 1,604, hamaze gupfa 19. Repubulika Iharanira Demokarasi ya Congo ni cyo Gihugu gihana imbibi n’u Rwanda kibasiwe cyane, kuko ubu ifite abanduye 4 390 barimo 96 bamaze gupfa.
Panorama.rw
