Nyuma y’uko Espagne yegukanye Igikombe cy’Isi cya 2026 itsinze Argentine igitego 1-0 mu minota 120, FIFA yatangaje abegukanye ibihembo by’abakinnyi bitwaye neza muri iri rushanwa ryasojwe mu ijoro ku wa 19 Nyakanga 2026.
Kapiteni wa Espagne, Rodri, yahawe Umupira wa Zahabu (Golden Ball) nk’umukinnyi wahize abandi muri iri rushanwa, nyuma yo kuba inkingi ya mwamba mu kibuga hagati no gufasha ikipe ye kwegukana Igikombe cy’Isi ku nshuro ya kabiri mu mateka yayo.
Rutahizamu w’u Bufaransa, Kylian Mbappé, yegukanye Urukweto rwa Zahabu (Golden Boot) nyuma yo gusoza irushanwa afite ibitego 10, byinshi kurusha abandi bakinnyi bose bitabiriye Igikombe cy’Isi cya 2026.
Myugariro ukiri muto wa Espagne, Pau Cubarsí, yatorewe igihembo cy’umukinnyi ukiri muto wahize Abandi (Best Young Player), nyuma yo kwitwara neza mu mikino yose y’iri rushanwa ndetse akagira uruhare rukomeye mu bwugarizi bwafashije Espagne kurangiza amarushanwa ifite umusaruro udasanzwe.
Umunyezamu wa Espagne, Unai Simón, na we yahembwe Golden Glove nk’umunyezamu wahize abandi, nyuma yo gusoza imikino irindwi y’Igikombe cy’Isi atarinjijwe igitego na kimwe, ibintu byagize uruhare rukomeye mu gutuma Espagne yegukana igikombe.
Umukino wa nyuma wahuje Espagne na Argentine wabereye kuri New York New Jersey Stadium muri Leta Zunze Ubumwe za Amerika, witabirwa n’abakuru b’ibihugu n’abayobozi batandukanye barimo Perezida wa Amerika Donald Trump, Perezida wa Mexique Claudia Sheinbaum, Minisitiri w’Intebe wa Canada Mark Carney, Umwami Felipe VI n’Umwamikazi Letizia ba Espagne ndetse na Perezida wa Espagne Pedro Sánchez.
Mbere y’uko umukino utangira, abari muri stade basusurukijwe n’umuhanzi w’icyamamare ku mbuga nkoranyambaga IShowSpeed, wakurikiwe n’abaraperi b’Abanyamerika Post Malone na Swae Lee, mu birori byagaragaje ubukomeye bw’umukino wa nyuma.
Ikipe ya Espagne yatangiye umukino igenzura umupira cyane, ariko amakipe yombi abura uburyo bwinshi bwo gutsinda. Argentine yanditse amateka atifuzwa yo gusoza igice cya mbere idateye ishoti na rimwe rigana mu izamu, ibintu byari bibaye bwa mbere ku mukino wa nyuma w’Igikombe cy’Isi kuva mu 1966.
Mbere y’uko igice cya mbere kirangira, myugariro Lisandro Martínez yagize imvune asimburwa na Nicolás Otamendi, mu gihe Espagne yakomeje gusatira ariko ikabura igitego.
Mu gice cya kabiri, umunyezamu Emiliano Martínez yakomeje kubera ibamba ba rutahizamu ba Espagne, akuramo imipira myinshi yari iganisha ku bitego. Gusa ibintu byarushijeho gukomera kuri Argentine ubwo Enzo Fernández yahabwaga ikarita itukura, ikipe ye igasigara ikina ari abakinnyi 10.
Nyuma y’uko iminota 90 irangiye amakipe yombi anganya ubusa ku busa, hakurikiyeho iminota 30 y’inyongera. Ku munota wa 106 ni bwo Ferran Torres yatsinze igitego rukumbi cyahesheje Espagne intsinzi, nyuma y’urujijo rwabaye imbere y’izamu rya Argentine.
Espagne yahise yegukana Igikombe cy’Isi ku nshuro ya kabiri nyuma y’icyo yatwaye mu 2010, inahabwa miliyoni 50 z’Amadolari ya Amerika z’igihembo cy’uwabaye uwa mbere, hiyongeraho miliyoni 12 z’Amadolari y’uduhimbazamushyi.
Uyu mukino wanaranzwe n’amateka atandukanye. Lamine Yamal yabaye umukinnyi wa mbere ukinnye umukino wa nyuma wa Euro n’uwa nyuma w’Igikombe cy’Isi atarengeje imyaka 19. We na Pau Cubarsí binjiye mu bakinnyi bake cyane bakinnye umukino wa nyuma w’Igikombe cy’Isi batarageza ku myaka 19, basanga Pelé, Giuseppe Bergomi na Kylian Mbappé.
Ku ruhande rwa Argentine, Lionel Messi yiyongereye kuri Cafu mu bakinnyi bakinnye umukino wa nyuma w’Igikombe cy’Isi inshuro eshatu, ndetse aba n’umukinnyi ukuze kurusha abandi wakinnye umukino wa nyuma w’iri rushanwa ari umukinnyi wo hagati cyangwa usatira.
Abegukanye ibihembo bya FIFA mu Gikombe cy’Isi cya 2026
- Golden Ball (Umukinnyi mwiza): Rodri (Espagne)
- Golden Boot (Uwatsinze ibitego byinshi): Kylian Mbappé (U Bufaransa) – ibitego 10
- Golden Glove (Umunyezamu mwiza): Unai Simón (Espagne)
- Best Young Player (Umukinnyi ukiri muto mwiza): Pau Cubarsí (Espagne)
Ibi bihembo byasojwe bishimangira ubukaka bwa Espagne muri iri rushanwa, aho uretse kwegukana Igikombe cy’Isi, yanegukanye ibihembo bitatu muri bine by’ingenzi bitangwa na FIFA ku bakinnyi bitwaye neza.
Rodri, Unai Simón na Pau Cubarsí begukanye ibihembo byihariye mu Gikombe cy’Isi cya 2026
