Ikigo Nderabuzima cya Kabuye, kiri mu murenge wa Jabana, Akarere ka Gasabo, ku wa 28 Kanama 2020, cyashyikirijwe inkunga yiganjemo ibiribwa, ibikoresho by’isuku, udupfukamunwa ndetse n’ubwisungane mu kwivuza ku batarashoboye ku butanga bigenewe Imiryango itishoboye igera kuri 200 yiganjemo abafite ubwandu bwa Virusi itera SIDA.
Iyo nkunga yatanzwe n’Umuryango utari uwa Guverinoma wita ku mibereho y’abaturage, ubukungu n’iterambere (CSDI: Community Socio_Economic Development Initiatives) usanzwe ukorera muri uwo murenge kuva mu 2008, na wo ukaba waratewe inkunga na AHF Rwanda y’amafaranga y’u Rwanda agera hafi kuri miliyoni cumi n’ebyiri.
Inkunga yatanzwe irimo ibiribwa, ibikoresho by’isuku, udupfukamunwa… (Ifoto/Panorama)
Abagenerwabikorwa bavuze ko bishimiye inkunga begenewe kuko igiye kubafasha gukomeza guhangana n’ibibazo bahura na byo mu rugendo rw’ubuzima ariko kandi ari ni inkingi ibakomeza mu bindi bikorwa bafite bibafasha kubona ibibatunga.
Umukecuru w’imyaka 61 mu kiganiro n’Ikinyamakuru Panorama yagize ati “Iyi nkunga itwereka urukundo abantu badufitiye no kuba badutekereza. Ubusanzwe abafite ubwandu bwa Virusi itera SIDA imiti bafata ibasaba no kugira ibiribwa bihagije kandi bifite intungamubiri. Ibi bije kunganira ibindi dukora, ariko muri iki gihe cya COVID-19 bwo ntibyoroshye cyane cyane ku batunzwe n’ubushabitsi. Njye nsanzwe ntunzwe no gutunganya imitako, no gufuma ibitambaro ariko ubu isoko ryaraguye kuko hari ibyo noherezaga hanze bikaba bitakijyayo.”
Undi na we agira ati “Muri ibi bihe bya COVID-19 ubuzima buragoye cyane cyane kuri twebwe dufata imiti idufasha guhangana na Virusi itera SIDA. Iyo ubonye abagutekereza bakagufasha kubona ibiribwa n’inyunganizi baba baguhaye mu gukomeza kugira imbaraga zo kubaho. Ibi bituma tunatekereza ku bigomba kudutunga mu gihe ntawundi uzaba yadutekerejeho ariko muri ibi bihe bya COVID-19, imiryango myinshi ndetse na hano kwa muganga batubaye hafi.”
Rusanganwa Leon Pierre, Umuyobozi wa CSDI ari we unawuhagarariye mu mategeko avuga ko intego z’umuryango ari uguharanira uburenganzira bw’abatishoboye cyane cyane abari mu byiciro byihariye, imiyoborere myiza no guharanira iterambere rirambye binyuze mu gufasha abaturage mu kugira uruhare mu bibakorerwa mu iterambere ry’ubukungu, kubazwa inshingano no kongererwa ubumenyi mu bijyanye n’iterambere.
Umuyobozi wa CSDI ari na we uhagarariye umuryango mu rwego rw’amategeko, Rusanganwa Leon Pierre (Ifoto/Panorama)
Akomeza avuga ko ibyo ari byo byatumye mu 2016 begera abagenerwabikorwa bo mu murenge wa Jabana binyuze mu mushinga wo kugabanya akato n’ihezwa bikorerwa ababana na Virusi itera SIDA, bashyiraho amatsinda 45, aho buri tsinda rigizwe n’abanyamuryango nibura 20, agamije kubafasha kuganira ku mibereho yabo no kwigira. Kugeza ubu amatsinda 13 yatangiye imishinga yo kubateza imbere.
Agira ati “Muri ibi bihe bya COVID-19 hari abari bafite imirimo yahagaze, twatekereje rero uburyo aya matsinda yabo yakomeza kubaho, nibwo duhisemo gufasha abatishoboye muri bo tubaha ibiribwa, ibikoresho by’isuku, udupfukamunwa ndetse kuko hari n’abatarashobora gutanga ubwisungane mu kwivuza twabubatangiye. Ibi byose ikigo Nderabuzima kizabibagezaho kandi nk’uko dusanzwe dukorana bizakorwa neza.”
Mukaminega Jeannette, Umukozi ushinzwe imibereho myiza y’abaturage mu murenge wa Jabana, yashimiye CSDI agira ati “Gutekereza ku baturage nka bariya bikorwa n’abafite umutima wa kimuntu, si ukugira ibintu byinshi, kuko hari n’abafite byinshi badashobora gutekereza ku batishoboye. Muri ibi bihe bya COVID-19, iyo mubagobotse biza byunganira bike basanzwe bafite ariko kandi binabafasha mu gihe bafata imiti.”
Dr Brenda Kateera Asiimwe, Umuyobozi wa AHF mu Rwanda ashima CSDI imbaraga bashyira mu kwita ku batishoboye babafasha kwishakamo ibisubizo ku mibereho yabo n’iterambere rirambye (Ifoto/Panorama)
Dr Brenda Kateera Asiimwe, Umuyobozi wa AHF mu Rwanda avuga ko biteguye gukomeza gufasha umuryango CSDI mu bikorwa bigamije iterambere n’imibereho myiza bishingiye mu kwishakamo ibisubizo no kwigira, kuko kuva batangira gukorana mu 2016 babagaragarije imikorere n’imikoranire byiza.
Rwanyange Rene Anthere
