Binyuze mu masomo y’ubumenyi-ngiro ashingiye ku bumenyi n’ubushobozi umwana yifitemo, abanyeshuri bo mu mashuri abanza, ayisumbuye n’amakuru bakomeje kugaragaza udushya mu gushaka bimwe mu bisubizo by’ibibazo abaturage bafite. Minisiteri y’uburezi nay o buri mwaka ihemba abanyeshuri n’abarezi bagaragaje imishinga y’indashyikirwa.
Ku wa 6 Nzeri 2019, kuri Minisiteri y’uburezi habaye imurikabikorwa by’imishinga y’indashyikirwa yakozwe n’abanyeshuri, bagaragaje udushya bahereye ku bushobozi bafite, bagakora imishinga ishobora gutanga ibisubizo kuri bimwe mu bibazo igihugu gifite. Uwo munsi wabaye uwo kubashimira, bamwe mu barezi bahabwa moto, mudasobwa, Televiziyo n’ibindi. Abanyeshuri babiri mu kigo cya Maranyundo mu Bugesera bahembwe itike y’indege yo kujya guhugurwa mu ikoranabuhanga i Dubai.
Buri wese avoma akoresheje uburyo yahisemo kuko hari n’umwanya wo gushyiramo ibiceri (Ifoto/Panorama)
Umwe mu mishinga yagaragaje udushya mw’imurikabikorwa ryabereye kuri MINEDUC, ni uburyo bwo gucuruza amazi atari ngombwa ko umukozi ahahagarara ahubwo ugura yitwaza ibiceri, amafaranga muri telefoni cyangwa ikarita y’ikoranabuhanga, akavoma amazi angana n’amafaranga yatanze ubundi agahita yifunga.
Mu kiganiro n’Ikinyamakuru Panorama, Mugabo Kelly Theogene, umunyeshuri muri IPRC Kigali yahanze ivomero ry’ikoranabuhanga yise “Smart Voma”, umuntu abona amazi akurikije amafaranga afite, kandi nta muntu uhari ugomba kwishyuza.
Agira ati “Ubu buryo burondereza amazi kandi bigabanya gutwara amafaranga mu ntoki. Ushobora kubona amazi witwaje ibiceri, gukoresha Mobile Money cyangwa se ugakoresha SmartCard ukavoma amazi ukeneye. Amafaranga washyizemo niyo mazi uhabwa, kuko imashini ihita yifunga.”
Avuga ko umushinga we ugabanya abakozi bahora bahagaze ku mazi bavomesha kandi bikagabanya n’amazi yangirika ameneka, kuko amafaranga umuguzi yashyizemo iyo ashize amazi ahita ahagarara. Ubu buryo ntibuhenze ku buryo buri wese yabukoresha cyane cyane abacuruza amazi.
Abanyeshuri ba Maranyundo Girls School bahawe itike y’indege yo kujya kwihugura i Dubai (Ifoto/Nonaha.com)
Minisitiri w’Uburezi Dr. Mutimura Eugene, avuga kuri iki gikorwa no ku bihembo by’abantu bakoze ibikorwa by’indashyikirwa mu ikoranabuhanga no guhanga ibishya ndetse n’indi migirire ifite uruhare mu guteza imbere ireme ry’uburezi, yavuze ko ari igikorwa kizahoraho, bifuza uburezi kugera ku kerekezo k’igihugu.
Agira ati “Iki ni igikorwa kizahoraho kuko dutekereza ko ari igikorwa k’ingenzi kandi cyubakira ku mfashanyigisho ishingiye ku bushobozi yatangiye mu gihugu cyacu. Turahamya ko mu gihe kizaza, mu gihe ikoranabuhanga ritera imbere, ibi bikorwa bitandukanye by’indashyikirwa bizadufasha kugera ku byo twifuza mu guhindura ubukungu bw’igihugu ndetse n’imibereho myiza y’abaturarwanda.”
Abarezi bagaragaje imishinga n’ibikorwa by’indashyikirwa mu kuzamura ireme ry’uburezi bahawe amapikipiki (Ifoto/Panorama)
Ibihembo byatanzwe birimo moto, mudasobwa, inka, televiziyo nini, amatike y’indege yo kujya Dubai mu mahugurwa, telefone zigendanwa, ibikoresho by’ikoranabuhanga, imidari y’ishimwe, ikemezo k’ishimwe (Certificate) n’ibindi ku banyeshuri, abarimu, abayobozi b’ibigo by’amashuri n’abandi bagize uruhare mu guteza imbere ireme ry’uburezi binyuze mu guhanga udushya.
Rwanyange Rene Anthere
